Shruti Haasan: శ్రుతిహాసన్‌.. ఇప్పుడు రోజు తేడాతో.. అప్పుడు ఒకేరోజు!

ఇంటర్నెట్‌ డెస్క్‌: ఈ ఏడాది సంక్రాంతికి ఒక్క రోజు తేడాతో రెండు సినిమాల ద్వారా ప్రేక్షకులకు వినోదం పంచబోతున్నారు నటి శ్రుతిహాసన్‌ (Shruti Haasan). బాలకృష్ణ (Balakrishna) సరసన ఆమె నటించిన ‘వీరసింహారెడ్డి’ (Veera Simha Reddy) జనవరి 12న, చిరంజీవి (Chiranjeevi)తో కలిసి నటించిన ‘వాల్తేరు వీరయ్య’ (Waltair Veerayya) జనవరి 13న విడుదలకాబోతున్నాయి. ఇలా ఒకే హీరోయిన్‌ నటించిన రెండు సినిమాలు సంక్రాంతి బరిలో నిలవడం అరుదు. గతంలో నాన్‌ సంక్రాంతి సీజన్‌లోనూ శ్రుతిహాసన్‌కు ఇలాంటి అనుభవమే ఎదురైంది. ఇప్పుడు ఒక్క రోజు తేడాతో రెండు తెలుగు చిత్రాలతో వస్తుంటే అప్పుడు ఒక్క రోజే రెండు హిందీ సినిమాలతో ప్రేక్షకుల ముందుకొచ్చారామె. ఆ చిత్రాలేవో కాదు.. ‘రామయ్యా వస్తావయ్యా’, ‘డి- డే’. ఈ రెండూ 2013 జులై 19న విడుదలయ్యాయి.

తెలుగులో మంచి విజయం అందుకున్న రొమాంటిక్‌ డ్రామా ‘నువ్వొస్తానంటే నేనొద్దంటానా’ రీమేక్‌గా రూపొందిన చిత్రం ‘రామయ్యా వస్తావయ్యా’. గిరీశ్‌కుమార్‌ కథానాయకుడు. రిషి కపూర్‌, ఇర్ఫాన్‌ఖాన్‌, అర్జున్‌ రాంపాల్‌ ప్రధాన పాత్రల్లో రూపొందిన యాక్షన్‌ థ్రిల్లర్‌ ‘డి- డే’లో శ్రుతిహాసన్‌, హ్యుమా ఖురేషి కథానాయికలుగా నటించారు. 2021లోనూ కొన్ని రోజుల వ్యవధిలోనే రెండు చిత్రాలతో సందడి చేశారు శ్రుతి. రవితేజ సరసన ఆమె నటించిన తెలుగు చిత్రం ‘క్రాక్‌’ ఆ ఏడాది జనవరి 9న, విద్యుత్‌ జమ్మాల్‌తో కలిసి నటించిన హిందీ సినిమా ‘ది పవర్‌’ జనవరి 14న (ఓటీటీలో) విడుదలయ్యాయి.