Gabbar Singh: ‘గబ్బర్‌సింగ్‌’ చేయనన్న పవన్‌కల్యాణ్‌.. టైటిల్‌కు స్ఫూర్తి ఆయనే!

ఇంటర్నెట్‌ డెస్క్‌: పవన్‌ కల్యాణ్‌ సినీ కెరీర్‌లోనే కాదు ఆయన అభిమానుల గుండెల్లో చిరస్థాయిగా నిలిచే చిత్రం ‘గబ్బర్‌సింగ్’. హిందీ సినిమా ‘దబాంగ్‌’కు రీమేక్‌గా దర్శకుడు హరీష్ శంకర్‌ తెరకెక్కించిన ఈ సినిమా టాలీవుడ్‌లో ఓ సంచలనం. అయితే, ఇందులో నటించేందుకు పవన్‌ అంతగా ఆసక్తి చూపించలేదు. అప్పుడున్న పరిస్థితుల దృష్ట్యా ‘ఎలాగైనా చేయాల్సిందే తప్పదు’ అని అనుకుంటూనే ఈ ప్రాజెక్టులోకి అడుగుపెట్టాల్సి వచ్చింది. ఈ సూపర్‌ హిట్‌ చిత్రం విడుదలై 10 ఏళ్లు పూర్తి చేసుకున్న సందర్భంగా ఆ వివరాలు తెలుసుకుందాం..

నేను చేయలేనని చెప్పా..

‘‘నేను ‘గబ్బర్ సింగ్‌’ చిత్రాన్ని తప్పని పరిస్థితుల్లో చేయాల్సి వచ్చింది. ‘దబాంగ్‌’ రీమేక్‌ నేను చేస్తే బాగుంటుందంటూ ఆ చిత్రం విడుదలైన 2-3 నెలల తర్వాత నాకు చూపించారు. అది చూశాక ఇలాంటి సినిమాలో నేనెలా నటించాలో నాకు అర్థం కాలేదు. ఈ చిత్ర కథనమంతా సల్మాన్‌ఖాన్‌ వ్యక్తిత్వానికి, యాటిట్యూడ్‌కి తగ్గట్టుగా ఉంటుంది. చాలా సినిమాల్లో చూపించినట్టు ఇందులోనూ తల్లి, కొడుకు కథే కదా, కొత్తదనం ఏముంది..? అని అనిపించి, నేను చేయలేనన్నా. కానీ కొన్ని కారణాలతో తక్కువ బడ్జెట్‌లో త్వరగా పూర్తయ్యే ఓ చిత్రం చేయాలని నిర్ణయించుకున్నా. అదే సమయంలో ‘దబాంగ్‌’ గుర్తొచ్చి మరోసారి చూశా. రీమేక్‌లో నటించేందుకు సిద్ధమయ్యా. ఈ చిత్రంలోని పోలీసు (కథానాయకుడు) పాత్ర ఎలా ఉండాలో నేనే డిసైడ్‌ చేసుకున్నా. ఈ సినిమాలోని హీరో తన వృత్తి పట్ల నిబద్ధతతో ఉంటాడు. కానీ, డ్రెస్సింగ్‌ స్టైల్‌, వ్యవహార శైలి చాలా విభిన్నంగా ఉంటాయి. ‘గుడుంబా శంకర్‌’లోని ఓ సన్నివేశంలో నేను చేసిన పోలీసు పాత్రను ఇందుకు స్ఫూర్తిగా తీసుకున్నా. అందులోని నా స్టైల్‌, వ్యక్తిత్వానికి ‘గబ్బర్‌ సింగ్’లోని పాత్ర దగ్గరగా ఉంటుంది’’ అని ఓ సందర్భంలో పవన్‌ కల్యాణ్‌ తెలిపారు.

ఆయనే స్ఫూర్తి

‘‘ఈ సినిమాలోని నా పాత్ర పేరు వెంకటరత్నం నాయుడు అయినా అందరూ ‘గబ్బర్‌సింగ్‌’ అంటుంటారు. ఈ పేరు పెట్టేందుకు స్ఫూర్తి.. ఒకప్పుడు ఓల్డ్‌ సిటీలో ఉన్న ఓ పోలీసు అధికారి. అప్పట్లో ఆయన్ని అంతా గబ్బర్‌సింగ్‌ అని పిలిచేవారు. ఆయన్ను నేను చూశా. కానీ, పరిచయం లేదు. ఆ పేరు నాకు చాలా నచ్చింది. కొన్ని సినిమాల్లోని పాత్రల్ని చూసినప్పుడు ‘ఫలానా పేరు బాగా సూట్‌ అవుతుంది’ అని అనిపిస్తుంటుంది. అలా ఈ చిత్రంలోని పోలీసు పాత్ర చూశాక దానికి ‘గబ్బర్‌సింగ్‌’ పేరైతేనే సరిపోతుందని ఫిక్స్‌ అయ్యా’’ అని పవన్‌ వివరించారు.

పవన్‌ స్థానంలో హరీష్‌

ఈ చిత్రంలోని ఓ సీన్‌లో పవన్‌ స్థానంలో దర్శకుడు హరీష్‌ శంకర్‌ కనిపించాడనే విషయం తక్కువ మందికి తెలిసి ఉండొచ్చు. ప్రత్యేక గీతం ‘కెవ్వుకేక’ పూర్తవగానే ఓ చెక్‌ పోస్ట్‌ దగ్గర విలన్లను ఆపేందుకు కథానాయకుడు రోడ్డుపై నుంచొనే సీన్‌ అది. రెప్పపాటు కాలం కనిపించే ఆ షాట్‌లో హరీష్‌ కనిపిస్తాడు. తీక్షణంగా పరిశీలిస్తేనేగానీ అక్కడుంది పవనా, హరీషా అని గుర్తించలేం. అంతగా మాయచేశారు.

మరికొన్ని..

* ఈ చిత్రాన్ని మెగా ఫ్యామిలీకి చెందిన అంజనా ప్రొడక్షన్స్‌లో చేయాలనుకున్నారు. కానీ, సాధ్యపడలేదు. దాంతో పరమేశ్వర ఆర్ట్స్‌ ప్రొడక్షన్స్‌లో రూపొందింది. బండ్ల గణేష్‌ నిర్మాతగా వ్యవహరించాడు.

* రూ. 30 కోట్ల బడ్జెట్‌తో తెరకెక్కిన ఈ సినిమా సుమారు రూ. 150 కోట్లు వసూళ్లు చేసిందని సినీ వర్గాలు పేర్కొన్నాయి. ఈ చిత్రం 306 కేంద్రాల్లో 50 రోజులకుపైగా, 65 కేంద్రాల్లో 100 రోజులకుపైగా ప్రదర్శితమై, రికార్డు నెలకొల్పింది.

* శ్రుతి హాసన్‌ అందాలు, దేవిశ్రీ ప్రసాద్‌ మ్యూజిక్‌ ఈ సినిమాకు అదనపు ఆకర్షణగా నిలిచాయి.