Ram Charan: పేరు అదేనా?

రామ్‌చరణ్‌ (Ram Charan) కథానాయకుడిగా శంకర్‌ (Shankar) దర్శకత్వంలో ఓ సినిమా రూపొందుతున్న సంగతి తెలిసిందే. కియారా అడ్వాణీ (Kiara Advani) కథానాయిక. దిల్‌రాజు (Dil Raju) నిర్మిస్తున్నారు. పాన్‌ ఇండియా స్థాయిలో ప్రేక్షకుల ముందుకు రానున్న ఈ సినిమా ప్రస్తుతం చిత్రీకరణ దశలో ఉంది. శంకర్‌ మార్క్‌ భారీతనంతోపాటు... సామాజిక అంశాలు ప్రధానంగా రూపొందుతున్నట్టు తెలుస్తోంది. త్వరలోనే ఈ సినిమాకి సంబంధించి ఓ కొత్త కబురుని వినిపించేందుకు చిత్రబృందం కసరత్తులు చేస్తున్నట్టు సమాచారం. ఉగాది సందర్భంగా ఈ నెల 22న కానీ లేదంటే, రామ్‌చరణ్‌ పుట్టినరోజైన ఈ నెల 27న కానీ సినిమా పేరుని ప్రకటించే అవకాశాలున్నట్టు తెలిసింది. పలు పేర్లు ప్రచారంలో ఉన్నప్పటికీ తాజాగా ‘సి.ఇ.ఓ’ (CEO) అనే పేరు గట్టిగా వినిపిస్తోంది. పాన్‌ ఇండియా స్థాయిలో రూపొందుతున్న సినిమా కాబట్టి, అన్ని భాషలకి తగ్గట్టుగా ఈ పేరుని ఎంపిక చేసే ఆలోచనలో చిత్రబృందం ఉన్నట్టు సమాచారం. సినిమాలో కథానాయకుడు రామ్‌చరణ్‌ ఓ యువ ఐఏఎస్‌ అధికారిగా సందడి చేయనున్నారు.