Sree Leela: విజయోత్సాహంతో సెట్లోకి అడుగులు

చేతి నిండా చిత్రాలతో క్షణం తీరిక లేకుండా గడిపేస్తోంది నటి శ్రీలీల (Sree Leela). వరస అవకాశాలతో కెరీర్‌ను పరుగులు పెట్టిస్తోంది. ఇటీవలే ‘ధమాకా’తో తొలి కమర్షియల్‌ హిట్‌ను అందుకున్న ఈ నాయిక ఇప్పుడు కథానాయకుడు రామ్‌ (Ram) చిత్రం కోసం రంగంలోకి దిగింది. బోయపాటి శ్రీను (Boyapati Srinu) తెరకెక్కిస్తున్న ఈ పాన్‌ ఇండియా సినిమాని శ్రీనివాస చిట్టూరి నిర్మిస్తున్న సంగతి తెలిసిందే. ప్రస్తుతం హైదరాబాద్‌లో శరవేగంగా చిత్రీకరణ జరుపుకుంటోంది. తాజాగా ఈ చిత్ర సెట్లోకి శ్రీలీల అడుగు పెట్టింది. ఈ విషయాన్ని చిత్ర బృందం తెలియజేసింది. రామ్‌, శ్రీలీలకు మధ్య సాగే కీలక సన్నివేశాల్ని చిత్రీకరిస్తున్నట్లు తెలిపింది. ‘‘అన్ని రకాల వాణిజ్యాంశాలతో నిండిన యాక్షన్‌ ఎంటర్‌టైనర్‌ ఇది. రామ్‌ మాస్‌ పాత్రలో సరికొత్తగా కనిపిస్తారు’’ అని చిత్ర వర్గాలు తెలిపాయి. ఈ సినిమాకి సంగీతం: తమన్‌, కూర్పు: తమ్మిరాజు, ఛాయాగ్రహణం: సంతోష్‌ డిటాకే.