Rajamouli: ‘ఆర్‌ఆర్‌ఆర్‌’ విజయానికి అదే కారణమని నమ్ముతున్నా..: రాజమౌళి

ఇంటర్నెట్‌ డెస్క్‌: ఆర్‌ఆర్‌ఆర్‌ సినిమా సృష్టించిన ప్రభంజనం అంతాఇంతా కాదు. ఈ సినిమా ఇటీవలే జపాన్‌లో విడుదలైన విషయం తెలిసిందే. అక్కడ కూడా ఆర్‌ఆర్‌ఆర్‌ సత్తా చాటుతూ వసూళ్ల వర్షం కురిపిస్తోంది. సాధారణ ప్రేక్షకులే కాదు హాలీవుడ్‌లోని ప్రముఖులు కూడా ఈ చిత్రాన్ని ప్రశంసిస్తున్నారు. తాజాగా ఓ మీడియా సంస్థతో మాట్లాడిన రాజమౌళి.. అద్భుతమైన హీరోయిజమే ఈ సినిమా విజయానికి కారణమన్నారు. ‘‘ప్రపంచవ్యాప్తంగా ఎంతో మంది భారతీయులు ఉన్నారు. భారతీయులు ఎక్కడ ఉన్నా ఈ చిత్రాన్ని ఆదరిస్తారని అనుకున్నా. కానీ, విదేశీయులు కూడా ఈ చిత్రంపై ఎంతో అభిమానం చూపిస్తున్నారు. ఇది నేను ఊహించలేదు. ఆర్‌ఆర్‌ఆర్‌లోని యాక్షన్‌ సన్నివేశాలు, అద్భుతమైన హీరోయిజం వల్లే ఈ సినిమా గొప్ప విజయం సాధించిందని నేను నమ్ముతున్నా’’ అని రాజమౌళి అన్నారు.

ఈ ఏడాది ప్రారంభంలో విడుదలైన ఈ చిత్రం ఎన్నో అవార్డులను సొంతం చేసుకుంటోంది. తాజాగా ఈ సినిమా హాలీవుడ్‌ చిత్రాలకిచ్చే ప్రముఖ శాటర్న్‌ అవార్డును తన ఖాతాలో వేసుకొంది. ఈ సంవత్సరం ఆస్కార్‌ బరిలోనూ ఆర్‌ఆర్‌ఆర్‌ నిలవనున్నట్లు చిత్రబృందం ఇటీవల ప్రకటించిన సంగతి తెలిసిందే.