Vijayendra prasad: ‘విక్రమార్కుడు-2’ రాబోతుంది.. కానీ!

ఇంటర్నెట్‌ డెస్క్‌: రవితేజ కథానాయకుడిగా ఎస్‌.ఎస్‌.రాజమౌళి తెరకెక్కించిన ‘విక్రమార్కుడు’ చిత్రం బ్లాక్‌ బాస్టర్‌ హిట్‌గా నిలిచిన విషయం తెలిసిందే. ఈ చిత్రానికి ఇప్పుడు సీక్వెల్‌ రాబోతుంది. కానీ, తెలుగులో కాదు.. హిందీలో. ‘విక్రమార్కుడు’ చిత్రాన్ని బాలీవుడ్‌లో అక్షయ్‌కుమార్‌తో ‘రౌడీ రాథోడ్‌’గా రీమేక్‌ చేశారు. దీనికి ప్రభుదేవ దర్శకత్వం వహించగా.. ప్రముఖ బాలీవుడ్‌ దర్శకుడు సంజయ్‌ లీలా భన్సాలీ నిర్మాతగా వ్యవహరించారు. అక్కడ కూడా ఈ చిత్రం మంచి విజయాన్ని అందుకోవడంతో ఇప్పుడు సీక్వెల్‌గా ‘రౌడీ రాథోడ్‌-2’ తీసేందుకు సన్నాహాలు జరుగుతున్నాయి. 

‘విక్రమార్కుడు’కు కథ అందించిన.. దర్శకుడు రాజమౌళి తండ్రి, సినీ రచయిత విజయేంద్ర ప్రసాదే ఈ సీక్వెల్‌ కోసం స్క్రిప్ట్‌ సిద్ధం చేస్తున్నారట. స్వయంగా ఆయనే  ఈ విషయాన్ని వెల్లడించారు. ‘రౌడీ రాథోడ్‌-2’ కోసం సంజయ్‌ లీలా భన్సాలీ.. విజయేంద్ర ప్రసాద్‌ను సంప్రదించారట. దీంతో కథ, స్క్రిప్ట్‌ రాసివ్వడానికి ఒప్పుకొన్నట్లు తెలుస్తోంది. కాగా.. ‘రౌడీ రాథోడ్‌’ కథకు కొనసాగింపుగా కాకుండా.. ఒక కొత్త కథతో సీక్వెల్‌ రాబోతుందట. ఇందులో అక్షయ్‌ కుమార్‌.. సోనాక్షి సిన్హా పాత్రలు మాత్రం యథాతథంగా కొనసాగిస్తారని సమాచారం. వచ్చే ఏడాది ఈ చిత్రం పట్టాలెక్కనుంది. మరోవైపు సల్మాన్‌ ఖాన్‌ ‘భజరంగీ భాయిజాన్‌’ చిత్రానికి సీక్వెల్‌ తీయబోతున్నట్లు ప్రకటించారు. ఈ చిత్రానికి కథ అందించింది కూడా విజయేంద్ర ప్రసాదే. మరి ‘భజరంగీ భాయిజాన్‌-2’ చిత్రం కోసం ఆయన పెన్ను పట్టుకుంటారా లేదా తెలియాల్సి ఉంది. దీనిపై ఎలాంటి ప్రకటన అయినా.. సల్మాన్‌ ఖాన్‌ ద్వారానే వెల్లడవుతుందని విజయేంద్ర ప్రసాద్ స్పష్టం చేశారు.

► Read latest Cinema News and Telugu News