RRR: ఆ రెండు చిత్రాలే ‘ఆర్‌ఆర్‌ఆర్‌’కు స్ఫూర్తి: రాజమౌళి

హైదరాబాద్‌: ప్రస్తుతం దర్శకధీరుడు రాజమౌళి (Rajamouli) పేరు ప్రపంచమంతా మార్మోగిపోతోంది. ‘ఆర్‌ఆర్‌ఆర్‌’ సినిమాతో భారతీయ సినిమా పేరును అంతర్జాతీయ వేదికలపై వినిపించేలా చేశారు ఈ టాలెంటెడ్‌ డైరెక్టర్‌. తాజాగా తనకు ‘ఆర్‌ఆర్‌ఆర్‌’ సినిమా తీయడానికి రెండు సినిమాలు స్ఫూర్తి అని తెలిపారు. తెలుగులో సూపర్‌ హిట్‌గా నిలిచిన అలనాటి చిత్రం ‘మాయాబజార్‌’ (Mayabazar) సినిమాలోని చాలా సన్నివేశాలు తనను ‘ఆర్‌ఆర్‌ఆర్‌’ చేయడానికి ప్రేరేపించాయని చెప్పారు. అలాగే మెల్‌ గిబ్సన్‌ (Mel Gibson) తీసిన సినిమాలోని సన్నివేశాలు ‘కొమురం భీం’ పాటకు ఎంతో ప్రేరణ అని అన్నారు.

వీటి గురించి మాట్లాడుతూ.. ‘‘గతంలో పురాణాల ఆధారంగా ఎన్నో సినిమాలు తెరకెక్కాయి. వాటిలో ఉపయోగించిన భాష ఆధునిక భాషకు దగ్గరగా లేదు. అందులో వాడిన భాష, పదాలు షేక్‌స్పియర్‌ భాషను పోలి ఉంటాయి. కానీ, మాయాబజార్‌లోని డైలాగ్‌లు వర్తమాన భాషకు దగ్గరగా ఉంటాయి. అలా చేయడానికి దర్శకుడికి చాలా ధైర్యం కావాలి. నేను ఆయన సాహసాన్ని చూసి ఆశ్చర్యపోయాను. అప్పట్లో తెలుగు పరిశ్రమలో ఉన్న చాలా మంది  స్టార్స్ ‘మాయాబజార్‌’ సినిమాలో ఉన్నారు. అలాంటి చాలా మంది స్టార్స్‌తో చేసిన ప్రయోగమే ‘మాయాబజార్‌’. ఆ సినిమా ‘ఆర్‌ఆర్‌ఆర్‌’కు ప్రేరణనిచ్చింది’’ అన్నారు.

‘‘అలాగే ‘ప్యాషన్‌ ఆఫ్‌ ది క్రైస్ట్‌’ (Passion of the Christ) సినిమా మొత్తాన్ని నేను ఒకేసారి చూడలేకపోయాను. ఆ సినిమా నాకు చాలా హింసాత్మకంగా అనిపించింది. అందులోని కొన్ని సన్నివేశాలు మాత్రం అద్భుతంగా అనిపించాయి. ‘కొమురం భీం’ పాటలో కొరడాతో కొట్టే సన్నివేశానికి ఆ సినిమానే స్ఫూర్తి’’ అని రాజమౌళి తెలిపారు.