Stand Up Rahul: ఫన్‌+ ఎమోషన్‌= ‘స్టాండప్‌ రాహుల్‌’ ట్రైలర్‌

ఇంటర్నెట్‌ డెస్క్‌: రాజ్‌ తరుణ్‌ కథానాయకుడిగా రూపొందిన చిత్రం ‘స్టాండప్‌ రాహుల్‌’. ‘కూర్చుంది చాలు!!’ అనేది ఉప శీర్షిక. వర్ష బొల్లమ్మ కథానాయిక. శాంటో మోహన్‌ వీరంకి దర్శకత్వం వహించిన ఈ చిత్రం మార్చి 18న ప్రేక్షకుల ముందుకురానుంది. ఈ సందర్భంగా చిత్ర బృందం తాజాగా ట్రైలర్‌ను విడుదల చేసింది. ‘‘మా బాస్‌ ఏ పనైనా రెండే నిమిషాల్లో చేస్తాడట’’ అని స్టాండప్‌ కమెడియన్‌గా రాజ్‌ తరుణ్‌ పలికిన సంభాషణతో ప్రారంభమైన ట్రైలర్‌ ఆద్యందం ఆసక్తిగా సాగింది. కామెడీ, ఎమోషన్‌తో ఈ సినిమాను తెరకెక్కించినట్టు ట్రైలర్‌ను చూస్తుంటే అర్థమవుతోంది. ‘‘లైఫ్‌లో సెటిల్‌ అవడం నీ బ్లడ్‌లోనే లేదు’’ అని రాజ్‌ తరుణ్‌ తల్లి పాత్ర చెప్పిన డైలాగ్‌ ట్రైలర్‌లో ప్రత్యేక ఆకర్షణగా నిలిచింది. ఈ స్టాండప్‌ రాహుల్‌ కథేంటో తెలియాలంటే సినిమా చూడాల్సిందే. నంద కుమార్‌ అబ్బినేని, భరత్‌ మాగులూరి సంయుక్తంగా నిర్మించిన ఈ చిత్రంలో మురళీ శర్మ, వెన్నెల కిశోర్‌ కీలక పాత్రలు పోషించారు. స్వీకర్‌ అగస్తి సంగీతం అందించారు.