Sukumar: అభిమాన పంట

అగ్ర దర్శకుడు సుకుమార్‌కు అభిమాన పంట పండింది. ఆయనపై ఉన్న అభిమానాన్ని ఓ నవ హీరో తన రెండున్నర ఎకరాల పొలంలో యాభై రోజుల వరిపంటతో ప్రదర్శించారు. ఈ అరుదైన దృశ్యానికి కడప జిల్లాలోని బోరెడ్డిగారిపల్లి గ్రామం వేదికైంది. ఆ వివరాల్లోకి వెళితే... ‘దూరదర్శిని’ సినిమాలో కథానాయకుడిగా నటిస్తున్న సువీక్షిత్‌ బొజ్జా దర్శకుడు సుకుమార్‌కు వీరాభిమాని. ఆ అభిమానాన్ని చాటి చెప్పేందుకు సొంత గ్రామంలోని వ్యవసాయ భూమిలో సుకుమార్‌ రూపంతో కనిపించేలా వరి పంటని సాగు చేశారు. యాభై రోజుల తర్వాత డ్రోన్‌ కెమెరాతో ఆ పంటని చిత్రీకరించారు. సుకుమార్‌ పేరుపై ప్రత్యేకంగా ఓ పాటని కూడా సిద్ధం చేశారు. సుకుమార్‌ రూపంతోపాటు ‘పుష్ప 2’ పేరు కూడా కనిపించేలా పంట సాగు చేశాడు నవనీత్‌. ఇటీవలే తన కార్యాలయంలో ఆ పంటకు సంబంధించిన వీడియోని చూసిన సుకుమార్‌ ‘నా నోట మాట రావడం లేదు, నా కళ్లు చెమర్చాయి. ఓ మనిషిమీద ఇంత అభిమానం ఉంటుందా?’ అంటూ సువీక్షిత్‌ని అభినందించారు. ఇటీవలే అల్లు అర్జున్‌ కథానాయకుడిగా సుకుమార్‌ తెరకెక్కించిన  ‘పుష్ప’ పాన్‌ ఇండియా స్థాయిలో ప్రేక్షకుల్ని అలరించిన సంగతి తెలిసిందే. ప్రస్తుతం ‘పుష్ప 2’ను పట్టాలెక్కించే పనిలో ఉన్నారు సుకుమార్‌.