ముందు ఆ బ్రేకప్‌ నుంచి బయటపడాలి.. తర్వాతే పెళ్లి అంటోన్న నటి

హైదరాబాద్‌: సినీ పరిశ్రమకు చెందిన పలువురు నటీనటులు త్వరలోనే పెళ్లి పీటలెక్కనున్న విషయం తెలిసిందే. హన్సిక, మంజిమా మోహన్‌, నాగశౌర్య ఇప్పటికే తమ వివాహ తేదీలను ప్రకటించారు. ఈ నేపథ్యంలో నటి సునయన (Sunaina) సైతం తన పెళ్లి గురించి ఆసక్తికర ట్వీట్‌ చేసింది. ‘రాజ రాజ చోర’తో నటిగా గుర్తింపు తెచ్చుకున్న ఆమె తాజాగా తన వివాహంపై స్పందించింది. ‘మేడమ్‌ మీరు పెళ్లి ఎప్పుడు చేసుకుంటారు?’ అని ఓ నెటిజన్ ప్రశ్నించగా.. ‘‘ఆ హార్ట్‌బ్రేక్‌ (బ్రేకప్‌ని ఉద్దేశిస్తూ) నుంచి ముందు బయటపడనివ్వండి’’ అని బదులిచ్చింది. ఈ ట్వీట్‌ కాస్త వైరల్‌గా మారింది. ‘‘బాధపడకండి. కచ్చితంగా ఆ బాధను అధిగమిస్తారు’’ అని నెటిజన్లు రిప్లై ఇస్తున్నారు.

పలు తెలుగు, తమిళ చిత్రాల్లో నటించి.. కథానాయికగా రాణిస్తోంది సునయన. ప్రస్తుతం ఓటీటీలోనూ అవకాశాలు వస్తున్నాయి. ఆమె కీలకపాత్రలో నటిస్తోన్న వెబ్‌సిరీస్‌ ‘మీట్‌ క్యూట్‌’. త్వరలో ప్రేక్షకుల ముందుకు రానున్న ఈ సిరీస్‌ ప్రమోషన్‌లో భాగంగా ఇటీవల ఆమె ట్విటర్‌ చాట్‌ నిర్వహించి.. తన పెళ్లి గురించి స్పందించింది.