Swapna dutt: ‘అర్జున్‌రెడ్డి’ విషయంలో బాధగా ఉన్నా: స్వప్నదత్‌

హైదరాబాద్‌: విజయ్‌ దేవరకొండ (Vijay Deverakonda) హీరోగా నటించిన ‘అర్జున్‌రెడ్డి’ (Arjun Reddy) విషయంలో ధైర్యం చేయలేక పోయినందుకు బాధగా ఉన్నట్లు మరోసారి వెల్లడించారు నిర్మాత స్వప్నదత్‌ (Swapna Dutt). ఆ సినిమా కథ ఎంతో నచ్చినప్పటికీ సమాజాన్ని దృష్టిలో ఉంచుకుని నిర్మించలేకపోయినట్లు తాజాగా ఇచ్చిన ఇంటర్వ్యూలో చెప్పారు.

‘‘అర్జున్‌ రెడ్డి’ కథ నాకెంతో నచ్చింది. ఆ చిత్రాన్ని నిర్మించాలని ఎంతో ఆశ పడ్డాను. కాకపోతే ఆ సమయంలో ధైర్యం చేయలేకపోయినందుకు బాధగానే ఉంది. ఒకవేళ ఆ సినిమా అటూ ఇటూ అయితే ఆడపిల్ల ఇలాంటి సినిమా చేసిందా? అని అంటారని భయపడ్డా. ఇక, ‘పెళ్లి చూపులు’పై నేను ఆసక్తి కనబర్చలేదు. సినిమా ఫార్మాట్‌ కాస్త భిన్నంగా ఉండటంతో నాకు అర్థం కాలేదు’’ అని స్వప్న తెలిపారు.

‘‘జీవితంలో ప్రతి విషయానికీ నేను సంతోషంగా ఉన్నాను. కెరీర్‌ పరంగా ఎన్నో ఎత్తుపల్లాలు చూశాను. ఒక ఛానల్‌ను ప్రారంభించి విఫలమై.. ఎన్నో విమర్శలు ఎదుర్కొన్నాం. అందులో పనిచేస్తోన్న ఉద్యోగుల కోసం కొంతకాలం ఇబ్బందులు పడుతూనే నడిపించాం. చివరికి చేసేది లేక దానిపై ఆశలు వదిలేసుకున్నాం. ఒకప్పుడు పరాజయం పొందడం వల్లే విజయం రుచి మరింత తెలిసింది. మేము మళ్లీ కమ్‌బ్యాక్‌ కాగలిగామంటే దానికి కారణం ప్రేక్షకులు. వాళ్ల వల్లే మేము తిరిగి నిలబడగలిగాం’’ అని ఆమె వివరించారు.