Taapsee: కలేమోననిన్న చెక్‌ చేసుకుంటూ ఉంటా!

‘‘ఆ చిత్రంలో అవకాశం కోసం నేను ఎవరితోనే ఫోన్‌ చేయించలేదు. అది నా ప్రతిభ ఆధారంగానే దక్కింది’’ అంటోంది కథానాయిక తాప్సి(Taapsee). అటు గ్లామర్‌ పాత్రలతోనూ, ఇటు నటనకు ప్రాధాన్యమున్న చిత్రాలతోనూ మెప్పిస్తున్న  ఈ అమ్మడు ఇటీవలే షారుక్‌(Sharukh Khan)-రాజ్‌కుమార్‌ హిరాణి(Rajkumar Hirani) కలయికలో రూపొందుతున్న ‘డంకి’(Dunki) చిత్రంలో నాయిక అవకాశాన్ని చేజిక్కించుకుంది. ఇటీవలే ఈ చిత్రానికి సంబంధించి ఒక షెడ్యూల్‌ పూర్తైంది. ఈ సందర్భంగా తాప్సి విలేకరులతో మాట్లాడుతూ..‘‘కింగ్‌ ఖాన్‌ షారుక్‌ సరసన నటించాలని తపించని నటులుండరు. అలాంటి అరుదైన అవకాశం నాకు దక్కింది. దీని కోసం నేను ఎవరి సిఫార్సులు అడగలేదు. నా గత చిత్రాల నటన నచ్చే దర్శకుడు హిరాణి ఎంపిక చేసుకున్నారు. ఒకవైపు షారుక్‌ లాంటి అగ్రనటుడు, మరోవైపు దేశగర్వించే దర్శకుడు హిరాణి... ఇలా ఇద్దరితో కలసి పనిచేసే అవకాశం రావడం పెద్ద వరం. ఇప్పటికీ దీన్ని నమ్మలేక.. గిల్లి మరీ చెక్‌ చేసుకుంటూ ఉంటాను. ఇది కలా? నిజమా? అని. ఇదంతా మరిచిపోలేని ఓ అనుభూతి’’ అంటూ చెప్పుకొచ్చింది. తాప్సి ప్రస్తుతం ‘శభాష్‌ మిథు’ చిత్ర ప్రచార కార్యక్రమాల్లో బిజీగా ఉంది. ఇది ప్రేక్షకుల ముందుకు వచ్చిన తర్వాత ‘డంకి’ రెండు షెడ్యూల్‌లో ఈ ముద్దుగుమ్మ పాల్గొననుంది.