The Ghost: ఓటీటీలో నాగార్జున ‘ది ఘోస్ట్‌’.. స్ట్రీమింగ్‌ ఎప్పుడంటే?

ఇంటర్నెట్‌డెస్క్‌: నాగార్జున (Nagarjuna) కథానాయకుడిగా ప్రవీణ్ సత్తారు దర్శకత్వంలో తెరకెక్కిన యాక్షన్‌ థ్రిల్లర్‌ ‘ది ఘోస్ట్‌’. దసరా కానుకగా ప్రేక్షకుల ముందుకు వచ్చిన ఈ చిత్రం యాక్షన్‌ మూవీ లవర్స్‌ మాత్రమే ఆకట్టుకోగలిగింది. ఇప్పుడు ఓటీటీ వేదికగా స్ట్రీమింగ్‌ అయ్యేందుకు సిద్ధమైంది. ఈ చిత్ర ఓటీటీ రైట్స్‌ను నెట్‌ఫ్లిక్స్‌ సొంతం చేసుకున్న సంగతి తెలిసిందే. నవంబరు 2వ తేదీ నుంచి నెట్‌ఫ్లిక్స్‌ వేదికగా ‘ది ఘోస్ట్‌’ స్ట్రీమింగ్‌ కానుంది. ఈ విషయాన్ని నెట్‌ఫ్లిక్స్‌ తెలిపింది. గతంలోనూ నాగార్జున నటించిన ‘వైల్డ్‌డాగ్‌’ థియేటర్‌లో అంతగా మెప్పించలేదు. అయితే, ఓటీటీలో మాత్రం ఆ చిత్రానికి విశేష ఆదరణ లభించింది. అత్యధిక రేటింగ్స్‌ను సొంతం చేసుకుంది. మరి ఇప్పుడు ‘ది ఘోస్ట్‌’ ఓటీటీలో ఎలా అలరిస్తుందో చూడాలి.

క‌థేంటంటే: విక్ర‌మ్ (నాగార్జున) ఇంట‌ర్‌పోల్ అధికారి.  ప్రియ (సోనాల్‌చౌహాన్‌)తో క‌లిసి దుబాయ్‌లో ప‌నిచేస్తుంటాడు. ఇద్ద‌రూ ప్రేమ‌లో ఉంటారు.  ఒక ఆప‌రేష‌న్‌లో పాల్గొన్నప్పుడు జ‌రిగిన సంఘ‌ట‌నలో రౌడీ మూక చేతుల్లో చిన్న పిల్లాడు చ‌నిపోతాడు. అది విక్రమ్‌పై తీవ్ర ప్ర‌భావం చూపిస్తుంది.  మాన‌సికంగా కుంగిపోతాడు.  ఆ త‌ర్వాత ప్రియ అత‌న్నుంచి దూరం అవుతుంది.  ఇంత‌లో ఉన్న‌ట్టుండి అను (గుల్‌ప‌నాగ్‌) నుంచి విక్ర‌మ్‌కి ఫోన్ వ‌స్తుంది. త‌న‌నీ, త‌న కూతురు అదితి (అనైకా సురేంద్ర‌న్‌)ని కాపాడ‌మని అను కోరుతుంది. దాంతో ఊటీకి బ‌య‌ల్దేరతాడు విక్ర‌మ్‌. ఆ క్ర‌మంలో అత‌నికి ఎలాంటి అనుభ‌వాలు ఎదుర‌య్యాయి? (The Ghost Review) ఇంత‌కీ అను ఎవ‌రు? ఆమెకీ, విక్ర‌మ్‌కీ సంబంధ‌మేమిటి?  ఆమెకి ఎవ‌రి నుంచి ముప్పు పొంచి ఉంది?  మ‌రి ఆమె కుటుంబాన్ని విక్ర‌మ్ ఎలా కాపాడాడ‌నేది తెర‌పై చూసి తెలుసుకోవాల్సిందే.