Skylab: రయ్‌.. రయ్‌.. ‘స్కైల్యాబ్‌’

సత్యదేవ్‌, నిత్యామేనన్‌, రాహుల్‌ రామకృష్ణ ప్రధాన పాత్రల్లో నటించిన చిత్రం ‘స్కైల్యాబ్‌’. విశ్వక్‌ ఖండేరావు తెరకెక్కించారు. పృథ్వీ పిన్నమరాజు నిర్మాత. ప్రస్తుతం నిర్మాణాంతర పనుల్లో ఉన్న ఈ సినిమా.. త్వరలో ప్రేక్షకుల ముందుకు రానుంది. ఈ నేపథ్యంలోనే ప్రచార పర్వాన్ని వేగవంతం చేస్తోంది చిత్ర బృందం. ఇందులో భాగంగా నవంబర్‌ 1న ట్రైలర్‌ విడుదల చేయనున్నట్లు గురువారం అధికారికంగా ప్రకటించారు. ఈ సందర్భంగా సత్యదేవ్‌ పాత్రను పరిచయం చేస్తూ.. కొత్త పోస్టర్‌ను అభిమానులతో పంచుకున్నారు. ఆయన ఇందులో ఆనంద్‌ అనే పాత్రలో కనిపించనున్నట్లు స్పష్టత ఇచ్చారు. ‘‘1979లో స్కైలాబ్‌ భూమిపై పడుతుందని, ప్రపంచం నాశనమై పోతుందని వార్తలొచ్చాయి. ఆ నేపథ్యంలో తెలుగు రాష్ట్రంలోని బండ లింగపల్లి గ్రామంలో ఉండే గౌరి, ఆనంద్‌, రామారావుల జీవితాల్లో స్కైల్యాబ్‌ వల్ల ఎలాంటి పరిణామాలు చోటు చేసుకున్నాయి? అన్నది ఈ చిత్ర కథాంశం’’ అని దర్శక నిర్మాతలు తెలియజేశారు. సంగీతం: ప్రశాంత్‌ ఆర్‌.విహారి, ఛాయాగ్రహణం: ఆదిత్య జవ్వాది.