Vivaha Bhojanambu: తెలుగు ప్రేక్షకులకు సందీప్‌ కిషన్‌ ఆఫర్‌

ఇంటర్నెట్‌ డెస్క్‌: స్వీయ నిర్మాణంలో తాను కీలక పాత్ర పోషించిన ‘వివాహ భోజనంబు’ చిత్రాన్ని చూసేందుకు 1000 కుటుంబాలకు సందీప్‌ కిషన్‌ ప్రత్యేక ఆఫర్ ప్రకటించారు. తనను ఆదరించిన ప్రేక్షకులతో ఆ సినిమా విడుదల సంబరాన్ని జరుపుకోవాలనుందన్నారు. సత్య కథానాయకుడిగా రామ్‌ అబ్బరాజు రూపొందించిన ఈ చిత్రంలో సందీప్‌ అతిథిగా నటించిన సంగతి తెలిసిందే. కె.ఎస్‌. శినీష్‌తో కలిసి సందీప్‌ ఈ చిత్రాన్ని నిర్మించారు. సోని లివ్‌ ఓటీటీ వేదికగా ఆగస్టు 27న ఈ చిత్రం విడుదల కానుంది.

ఈ నేపథ్యంలోనే తెలుగు ప్రేక్షకులకు సందీప్‌ ఓ లేఖ రాశారు. ‘వివాహ భోజనంబు.. వినోదాత్మక చిత్రం. 2 గంటలపాటు కడుపుబ్బా నవ్విస్తుంది. ఈ సినిమాకు పనిచేసిన దర్శకనటులు, సాంకేతిక బృందానికి ధన్యవాదాలు. ఈ చిత్రంతో కొంతమంది కొత్త వారిని పరిచయం చేస్తున్నందుకు నిర్మాతగా ఆనంద పడుతున్నా. నేనిలా ఉండటానికి కారణమైన తెలుగు ప్రేక్షకులతో ఈ సినిమా విడుదలను సంబురంలా జరపాలనుకుంటున్నా. ఈ సినిమా రిలీజ్‌ పోస్టర్‌తో మీ ఫ్యామిలీ ఫొటో జతచేసి, షేర్‌ చేయండి. సోనీ లివ్‌ సబ్‌స్క్రిప్షన్‌ను నా నుంచి బహుమతిగా స్వీకరించండి’ అని తెలిపారు. ఇలా పోస్ట్‌ చేసిన తొలి 1000 మందికి సోనీ లివ్‌ సబ్‌స్క్రిప్షన్‌ ఉచితంగా అందించనున్నారు.