Bheemla Nayak: భీమ్లానాయక్‌ షూట్‌.. పవన్‌ను చూసేందుకు ఎగబడిన జనం

హైదరాబాద్‌: పవర్‌స్టార్‌ పవన్‌కల్యాణ్‌, రానా ప్రధాన పాత్రల్లో నటిస్తున్న చిత్రం ‘భీమ్లానాయక్‌’. శరవేగంగా చిత్రీకరణ జరుపుకొంటున్న ఈ సినిమా కొత్త షెడ్యూల్‌ శుక్రవారం ఉదయం వికారాబాద్‌లోని మదన్‌పల్లి ఎల్లమ్మ ఆలయం వద్ద ప్రారంభమైంది. ఇక్కడ కీలక సన్నివేశాలు చిత్రీకరించనున్నారు. తాజాగా పవన్‌కల్యాణ్‌ సెట్‌లోకి అడుగుపెట్టారు. విషయం తెలుసుకున్న స్థానికులు పవన్‌ను చూసేందుకు భారీగా లొకేషన్‌ వద్దకు చేరుకున్నారు. ‘‘పవన్‌కల్యాణ్‌.. పవన్‌కల్యాణ్‌’’ అంటూ నినాదాలు చేశారు. దీంతో ఆయన కారు నుంచి బయటకు వచ్చి అభిమానులకు అభివాదం చేశారు. పెద్ద సంఖ్యలో అభిమానులు రావడంతో చిత్రీకరణ జరిగే ప్రాంతంలో సందడి వాతావరణం నెలకొంది.

సాగర్‌ కె.చంద్ర దర్శకత్వం వహిస్తోన్న ఈసినిమాలో పవన్‌కల్యాణ్‌ పవర్‌ఫుల్‌ పోలీస్‌ రోల్‌లో కనిపించనున్నారు. పవన్‌కు జోడీగా నిత్యామేనన్‌, రానాకు జంటగా సంయుక్త మేనన్‌ సందడి చేయనున్నారు. సితార ఎంటర్‌టైన్‌మెంట్స్‌ బ్యానర్‌పై సూర్యదేవర నాగవంశీ ఈ చిత్రాన్ని నిర్మిస్తున్నారు. సంక్రాంతి కానుకగా జనవరి 12న ఈసినిమా ప్రేక్షకుల ముందుకు రానుంది.

► Read latest Cinema News and Telugu News