Chiranjeevi: సాయిధరమ్‌ తేజ్‌కి మీ ఆశీస్సులు అలా అందుతాయని ఆశిస్తున్నా!

హైదరాబాద్‌: తన మేనల్లుడు, నటుడు సాయిధరమ్‌ తేజ్‌ త్వరగా కోలుకుంటున్నాడని తెలియజేశారు మెగాస్టార్‌ చిరంజీవి. సాయిధరమ్‌ తేజ్‌ హీరోగా నటించిన ‘రిపబ్లిక్‌’ చిత్రం అక్టోబరు 1న విడుదలకానుంది. ఈ సందర్భంగా చిత్ర బృందానికి శుభాకాంక్షలు తెలియజేస్తూ ట్వీట్‌ చేశారు. ‘సాయిధరమ్‌ తేజ్‌ త్వరగా కోలుకుంటున్నాడు. ‘రిపబ్లిక్‌’ చిత్ర విజయం రూపంలో అతనికి మీ అందరి ఆశీస్సులు అందుతాయని ఆశిస్తున్నా. చిత్ర బృందానికి నా శుభాకాంక్షలు. కొవిడ్‌ కారణంగా కుదేలైన ఎగ్జిబిటర్లకి ఈ సినిమా మంచి ఫలితం అందించాలని కోరుకుంటున్నా’ అని పేర్కొన్నారు.

దేవ కట్టా దర్శకత్వంలో రూపొందిన చిత్రమిది. ఐశ్వర్య రాజేశ్‌ కథానాయిక. రమ్యకృష్ణ కీలక పాత్ర పోషించారు. స్పోర్ట్స్‌ బైక్‌పై ప్రయాణిస్తున్న సాయిధరమ్‌ ప్రమాదానికి గురైన సంగతి తెలిసిందే. ఈ ఘటనలో ఆయన తీవ్రంగా గాయపడ్డారు. అపోలో ఆస్పత్రిలో చికిత్స పొందుతున్నారు.