Tollywood: ముందుంది ‘మెగా పండగ’.. ఆకట్టుకుంటోన్న ‘స్టూవర్ట్‌పురం దొంగ’!

ఇంటర్నెట్‌ డెస్క్‌: దీపావళి సందర్భంగా పలువురు దర్శకనిర్మాతలు తమ కొత్త చిత్రాల వివరాల్ని పంచుకున్నారు. పండగ శుభాకాంక్షలు తెలియజేస్తూ ఆయా సినిమాలపై ఆసక్తిని పెంచుతున్నారు. ఈ క్రమంలో ఇప్పటికే ఎన్నో చిత్రాల ఫస్ట్‌లుక్స్‌, పాటల ప్రోమో సందడి చేశాయి. తాజాగా  చిరంజీవి, బెల్లంకొండ సాయి శ్రీనివాస్‌, నాగశౌర్య చిత్రాలకు సంబంధించిన అప్‌డేట్స్‌ వెలువడ్డాయి. అవేంటో చూసేయండి..

పూనకాలు లోడింగ్‌..

చిరంజీవి హీరోగా దర్శకుడు కె.ఎస్‌. రవీంద్ర (బాబీ) గతంలో ఓ చిత్రాన్ని ప్రకటించిన విషయం తెలిసిందే. ఈ సినిమా చిత్రీకరణ ఎప్పుడు ప్రారంభమవుతుందో తాజాగా తెలియజేశారు. ‘మెగా 154’ వర్కింగ్‌ టైటిల్‌తో ఈ చిత్రాన్ని నవంబరు 6న ఉదయం 11: 43 ని.లకు లాంఛనంగా ప్రారంభించనున్నట్టు తెలిపారు. ‘ముందుంది మెగా పండగ’ అని వ్యాఖ్యానించారు. అదే రోజున మధ్యాహ్నం 12:06 ని.లకు చిరంజీవి లుక్‌ని విడుదల చేయనున్నారు. ఈ చిత్రాన్ని మైత్రీ మూవీ మేకర్స్‌ సంస్థ నిర్మిస్తోంది. దేవిశ్రీ ప్రసాద్‌ సంగీతం అందిస్తున్నారు. నాయిక, టైటిల్ వివరాలు త్వరలోనే తెలియనున్నాయి. ‘పూనకాలు లోడింగ్‌’ అంటూ చిత్ర బృందం సినిమాపై ఆసక్తిని పెంచుతోంది.

విభిన్న లుక్‌లో సాయి శ్రీనివాస్‌..

1970ల్లో పోలీసు అధికారులకు ముచ్చెమటలు పట్టించిన స్టూవర్ట్‌పురం దొంగ టైగర్‌ నాగేశ్వరరావు జీవితాధారంగా తెరకెక్కుతోన్న చిత్రం ‘స్టూవర్ట్‌పురం దొంగ’. బయోపిక్‌ ఆఫ్‌ టైగర్‌ అనేది ఉపశీర్షిక. టైటిల్‌ పాత్ర పోషిస్తోన్న బెల్లంకొండ సాయి శ్రీనివాస్‌ ఫస్ట్‌లుక్‌ని చిత్ర బృందం విడుదల చేసింది. రెండు చేతులతో ఆయుధాలు పట్టుకుని సీరియస్‌గా కనిపించారు సాయి శ్రీనివాస్‌. నాటి పరిస్థితులకు అద్దం పట్టేలా తీర్చిదిద్దిన ఈ పోస్టర్‌ అందరినీ ఆకట్టుకునేలా ఉంది. హీరోగా ఆయనకు ఇది 10వ చిత్రం. కె. ఎస్‌. దర్శకత్వం వహిస్తున్నారు. మణిశర్మ సంగీతం అందిస్తున్నారు.

ఓ లక్ష్యం.. గీతం

నాగశౌర్య హీరోగా సంతోష్‌ జాగర్లపూడి తెరకెక్కిస్తోన్న చిత్రం ‘లక్ష్య’. కేతిక శర్మ కథానాయిక. జగపతిబాబు కీలక పాత్ర పోషిస్తున్నారు. కాల భైరవ సంగీతం అందిస్తోన్న ఈ సినిమా నుంచి ‘ఓ లక్ష్యం’ అంటూ సాగే పాటకి సంబంధించిన ప్రోమో విడుదలైంది. శౌర్య, జగపతిబాబు మధ్య ఉన్న అనుబంధాన్ని ఇందులో చూపించారు. పూర్తి పాట నవంబరు 6న విడుదలకానుంది.