Cinema News: అది పెద్ద విషయం కాదు.. నేషనల్‌ లెవెల్లో ఒక్క గోల్డ్‌!

ఇంటర్నెట్‌ డెస్క్‌: ఆదిపినిశెట్టి ప్రధాన పాత్రలో తెరకెక్కుతోన్న చిత్రం ‘క్లాప్‌’. పృథ్వీ ఆదిత్య దర్శకుడు. ఆకాంక్ష సింగ్‌ కథానాయిక. తమిళ, తెలుగు భాషల్లో విడుదలకానున్న ఈ చిత్ర తెలుగు టీజర్‌ని ప్రముఖ నటుడు చిరంజీవి విడుదల చేశారు. ‘నా పేరు విష్ణు.. నాకు తెలిసిందంతా..’ అంటూ హీరో పాత్రని పరిచయం చేసే సన్నివేశంతో ప్రారంభమైన ఈ టీజర్‌ ఆద్యంతం ఆసక్తిగా సాగింది. ఆది ఇందులో అథ్లెట్‌గా కనిపించారు. ‘కొంచెం టాలెంట్‌, రెండు కాళ్లు ఉంటే ఇక్కడ గెలిచేస్తారని అనుకుంటున్నావా’ అని బ్రహ్మాజీ, ‘స్టేట్‌ లెవెల్లో గెలిచేస్తావ్‌. అది పెద్ద విషయం కాదు. నేషనల్‌ లెవెల్లో ఒక్క గోల్డ్‌’ అంటూ ప్రకాశ్‌ రాజ్‌ చెప్పిన సంభాషణలు ఆకట్టుకుంటున్నాయి. నాయకానాయికల నటన మెప్పిస్తోంది. మరి విష్ణు అనుకున్న లక్ష్యం చేరుకున్నాడా? దాని కోసం ఎంతగా శ్రమించాడు? తెలియాలంటే సినిమా చూడాల్సిందే. బిగ్‌ ప్రింట్‌ పిక్చర్స్‌ సంస్థ నిర్మిస్తోన్న ఈ చిత్రానికి ఇళయరాజా సంగీతం అందిస్తున్నారు. ఈ సినిమా అన్ని కార్యక్రమాలు పూర్తి చేసుకుని త్వరలోనే ప్రేక్షకుల ముందుకురానుంది.