Cinema News: ‘దక్ష’ ఎవరు?

ప్రముఖ నటుడు శరత్‌బాబు సోదరుడి తనయుడు ఆయుష్‌ హీరోగా పరిచయమవుతున్న చిత్రం ‘దక్ష’. అను, నక్షత్ర కథానాయికలు. వివేకానంద విక్రాంత్‌ దర్శకుడిగా పరిచయం అవుతున్నారు. తల్లాడ శ్రీనివాస్‌ నిర్మాత. ఈ సినిమా టైటిల్‌ లోగో ఆవిష్కరణ కార్యక్రమం ఇటీవల హైదరాబాద్‌లో జరిగింది. ప్రముఖ నటులు శరత్‌బాబు, తనికెళ్ల భరణి ముఖ్య అతిథులుగా హాజరయ్యారు. తనికెళ్ల భరణి మాట్లాడుతూ ‘‘శరత్‌బాబు నాకు మంచి మిత్రుడు. ఎన్నో చిత్రాల్లో కలిసి పనిచేశాం. ఆయన ఆయుష్‌ని పరిచయం చేయాలని చెప్పినప్పుడు నేను ఈ చిత్ర సహ నిర్మాత సాయికృష్ణ పేరు సూచించా. తను దర్శకత్వం వహించిన ఓ లఘు చిత్రానికి జాతీయ పురస్కారం వచ్చింది. తను తన సహచరుడిని దర్శకుడిని చేసి ఈ సినిమాని ముందుండి నడిపించాడు. తను గొప్ప స్థాయికి చేరుకుంటాడు. ఒక మంచి బృందం కలిసి ఈ సినిమా చేసింది. తప్పకుండా ప్రేక్షకుల్ని మెప్పిస్తుందనే నమ్మకం నాకుంది’’ అన్నారు. శరత్‌బాబు మాట్లాడుతూ ‘‘ఆయుష్‌ నా దగ్గరే పెరిగాడు. తను నా బిడ్డే. పిల్లల తమ కంటే ఉన్నత స్థాయికి ఎదగాలని కోరుకుంటారు కదా, అలా ఆయుష్‌ తనదైన ప్రత్యేకతతో పేరు సంపాదించాలని మనస్ఫూర్తిగా కోరుకుంటున్నా. ‘దక్ష’తో అందరికీ పేరు, లాభాలు రావాలని మనస్ఫూర్తిగా కోరుకుంటున్నా’’ అన్నారు. ఆయుష్‌ మాట్లాడుతూ ‘‘హీరో కావాలనేది నా కల. ముంబయిలో శిక్షణ తీసుకున్నా. ‘దక్ష’ ఒక థ్రిల్లర్‌ చిత్రం. ఇందులో దక్ష ఎవరు? ఆ వ్యక్తి వెనక కథేమిటన్నది తెరపైనే చూడాలి. జనవరి లేదా ఫిబ్రవరిలో విడుదల చేస్తాం’’ అన్నారు. ఈ కార్యక్రమంలో తల్లాడ వెంకన్నతోపాటు పలువురు పాల్గొన్నారు.