Devkatta: ఓ ‘రుద్రవీణ’ కావాలనుకున్నా

చిరంజీవి 153 సినిమాల్లో నంబర్‌ వన్‌ ఏదంటే ‘రుద్రవీణ’ అని చెబుతారు. మా ‘రిపబ్లిక్‌’ అలా ఓ ‘రుద్రవీణ’ కావాలనే లక్ష్యంతోనే తీశా. ఆ గౌరవం మాకు దొరికింది’’ అన్నారు దర్శకుడు దేవా కట్టా. ఆయన దర్శకత్వంలో సాయితేజ్‌ కథానాయకుడిగా తెరకెక్కిన చిత్రం ‘రిపబ్లిక్‌’.    ఇప్పటికే విడుదలైన ఈ సినిమా ఈ నెల 26న ఓటీటీ వేదిక జీ5లో ప్రదర్శితమవుతోంది. ఈ సందర్భంగా ఏర్పాటు చేసిన విలేకర్ల సమావేశం దేవా కట్టా మాట్లాడారు. ‘‘ఆ సినిమాతో మాకు ఓ గౌరవం దక్కాలని నేనూ, సాయితేజ్‌ అనుకున్నాం. రాజకీయాల గురించి ఇంకెవరూ మాట్లాడలేనంతగా 360 డిగ్రీల్లో విశ్లేషించాలనుకున్నా. ప్రేక్షకుల స్పందన మాకెంతో సంతోసాన్నిచ్చింది. జీ5లో ఈ సినిమాతోపాటు,    అదనంగా మా బృందం విశ్లేషణతో కూడిన మరో వెర్షన్‌ ఉంటుంది’’ అన్నారు. ఈ కార్యక్రమంలో నటుడు జగపతిబాబు, రవివర్మ, రచయిత కిరణ్‌, జీ స్టూడియోస్‌ వైస్‌ ప్రెసిడెంట్‌ ప్రసాద్‌ నిమ్మకాయల, మార్కెటింగ్‌ డైరెక్టర్‌ లాయిడ్‌ గ్జేవియర్‌, సతీష్‌ బీకేఆర్‌ తదితరులు పాల్గొన్నారు.