DSJ: ఐదు భాషల్లో.. ‘డిఎస్‌జె’

నట్టి కరుణ ప్రధాన పాత్రలో నట్టికుమార్‌ తెరకెక్కించిన చిత్రం ‘డిఎస్‌జె’ (దెయ్యంతో సహజీవనం). నట్టి క్రాంతి నిర్మాత. సుపర్ణ మలాకర్‌ మరో కథానాయిక. ఈ సినిమా తెలుగు, హిందీ, తమిళ, కన్నడ, మలయాళ భాషల్లో జనవరి 28న విడుదల కానుంది. ఈ సందర్భంగా దర్శకుడు నట్టి కుమార్‌ మాట్లాడుతూ.. ‘‘ఒక యథార్థ కథ ఆధారంగా ఈ చిత్రాన్ని రూపొందించాం. తనకు జరిగిన అన్యాయానికి ఒక ఆత్మ ఏ విధంగా ప్రతీకారం తీర్చుకుందనేదాన్ని హారర్‌ నేపథ్యంలో వినూత్నంగా చూపిస్తున్నాం’’ అన్నారు. ‘‘తొలి చిత్రంలోనే విభిన్న కోణాలలో నటించే పాత్ర లభించింది. నటిగా నాకెంతో పేరు తెచ్చే పాత్రవుతుంది. మా నాన్న దర్శకత్వంలో కథానాయికగా పరిచయమవుతున్నందుకు ఆనందంగా ఉంది’’ అంది నాయిక కరుణ. నిర్మాత మాట్లాడుతూ.. ‘‘చిన్న చిత్రాలకు అనుకూలంగా టికెట్‌ ధరలు ఉండేలా నిర్ణయం తీసుకున్న తెలంగాణ రాష్ట్ర ప్రభుత్వానికి ధన్యవాదాలు’’ అన్నారు. ఈ చిత్రానికి సంగీతం: రవిశంకర్‌, ఛాయాగ్రహణం: వెంకట హనుమ నరిశెట్టి.