Puneeth Rajkumar: ‘గంధద గుడి’.. పునీత్‌కి అసలైన నివాళి ఇదే: రాజమౌళి

ఇంటర్నెట్‌ డెస్క్‌: కన్నడ నటుడు దివంగత పునీత్‌ రాజ్‌కుమార్‌ డ్రీమ్‌ ప్రాజెక్ట్‌ ‘గంధద గుడి’. ఆయన నటించిన చివరి చిత్రమిది. వచ్చే ఏడాది ప్రేక్షకుల ముందుకు రానుంది. ఇటీవల విడుదలైన ఈ సినిమా టీజర్‌ను చూసిన ప్రముఖ దర్శకుడు రాజమౌళి స్పందించారు. సంబంధిత వీడియోను సామాజిక మాధ్యమాల్లో షేర్‌ చేస్తూ చిత్ర బృందానికి శుభాకాంక్షలు తెలిపారు. ‘‘గంధద గుడి’ టీజర్‌ చాలా అద్భుతంగా ఉంది. ఈ చిత్రం పునీత్‌కి అసలైన నివాళిగా నిలుస్తుంది. కర్ణాటక గొప్పతనాన్ని ప్రపంచానికి తెలియజేయాలనే అప్పూ కల ప్రశంసనీయమైంది’ అని అన్నారు. ఈ చిత్రానికి అమోఘవర్ష దర్శకత్వం వహిస్తున్నారు. అజనీశ్‌ లోక్‌నాథ్‌ సంగీతం అందిస్తున్నారు. కర్ణాటకలోని వైల్డ్​లైఫ్​ ఆధారంగా ఈ ప్రాజెక్ట్‌ రూపొందుతోంది. ఈ సినిమాకి పునీత్​ నిర్మాతగానూ వ్యవహరించారు. దర్శకుడు అమోఘవర్షతో కలిసి తెరను పంచుకున్నారు. గుండెపోటు కారణంగా పునీత్‌ చనిపోయిన విషయం తెలిసిందే. ఆయన అకాల మరణాన్ని చిత్ర వర్గాలు, సినీ ప్రేక్షకులు ఇప్పటికీ జీర్ణించుకోలేకపోతున్నారు.

► Read latest Cinema News and Telugu News