Varudu Kavalenu: వడ్డాణం చుట్టేసి వచ్చారే భామలు..!

హైదరాబాద్‌: నాగశౌర్య-రీతూవర్మ జంటగా నటిస్తున్న ఫ్యామిలీ ఎంటర్‌టైనర్‌ ‘వరుడు కావలెను’. లక్ష్మి సౌభాగ్య దర్శకురాలిగా తెరకెక్కిస్తున్న ఈ సినిమా దసరా కానుకగా ప్రేక్షకుల ముందుకు రానుంది. అందమైన గడసరి అమ్మాయిని ప్రేమించి పెళ్లి చేసుకునేందుకు.. ఓ అబ్బాయి పడే  కష్టాలను చూపిస్తూ ఈ చిత్రాన్ని తీర్చిదిద్దారు. యూత్‌ఫుల్‌ కథాంశంతో తెరకెక్కిన ఈ సినిమా అక్టోబర్‌ 15న విడుదల కానుంది. ఈ నేపథ్యంలో తాజాగా ఈ సినిమా నుంచి ‘వడ్డాణం చుట్టేసి వచ్చారే భామలు’ అంటూ సాగే పాటను చిత్రబృందం విడుదల చేసింది. గీతామాధురి అండ్‌ కో ఈ పాటను ఎంతో హుషారెత్తించేలా ఆలపించారు. సితార ఎంటర్‌టైన్‌మెంట్స్‌ పతాకంపై సూర్యదేవర నాగవంశీ ఈ చిత్రాన్ని నిర్మిస్తున్నారు. తమన్‌ సంగీతం అందిస్తున్నారు. మురళీ శర్మ, నదియా, వెన్నెల కిషోర్‌, ప్రవీణ్‌, హర్ష తదితరులు కీలక పాత్రలు పోషించారు.