Radhakrishna: సమయాలు కఠినం

మరోసారి సినిమాలు వాయిదాని ప్రకటిస్తున్న సమయమిది. కరోనా, ఒమిక్రాన్‌ పరిస్థితుల ప్రభావంతో ఇప్పటికే ‘ఆర్‌.ఆర్‌.ఆర్‌’, ‘జెర్సీ’ సినిమాలు వాయిదా పడ్డాయి. పాన్‌ ఇండియా స్థాయిలో రూపొందిన ‘రాధేశ్యామ్‌’ విడుదలపైన సందేహాలు తలెత్తాయి. కానీ చిత్రబృందం అనుకున్న సమయానికే విడుదల చేస్తామని ప్రకటిస్తూ వచ్చింది. తాజాగా ఆ చిత్ర దర్శకుడు చేసిన ట్వీట్‌ సినీ అభిమానుల్లో చర్చకి దారి తీసింది.  ‘‘సమయాలు కఠినమైనవి. హృదయాలు బలహీనంగా ఉన్నాయి, మనసస్సులు అల్లకల్లోలంగా ఉన్నాయి. జీవితం మనపై ఏది విసిరినా మన ఆశలు ఎప్పుడూ ఉన్నతంగానే ఉంటాయి’’ అంటూ ట్వీట్‌ చేశారు దర్శకుడు రాధాకృష్ణ కుమార్‌. ఆ ట్వీట్‌నిబట్టి ‘రాధేశ్యామ్‌’ వాయిదా పడుతుందా అనే సందేహాలు వ్యక్తమవుతున్నాయి. ఈ నెల 10న చిత్రబృందం తుది నిర్ణయం తీసుకునే అవకాశాలు ఉన్నట్టు తెలుస్తోంది. ప్రభాస్‌ కథా నాయకుడిగా నటించిన చిత్రమిది. పూజాహెగ్డే కథానాయికగా నటించారు.