Major: ‘మేజర్‌’ యాక్షన్‌ షురూ

అడివి శేష్‌ కథానాయకుడిగా శశి కిరణ్‌ తిక్కా తెరకెక్కిస్తున్న చిత్రం ‘మేజర్‌’. ముంబయి 26/11 ఉగ్రదాడుల్లో  వీరమరణం పొందిన ఎన్‌ఎస్‌జీ కమాండో మేజర్‌ సందీప్‌ ఉన్ని కృష్ణన్‌  జీవితాధారంగా రూపొందుతోంది. దీన్ని మహేష్‌బాబు జీఎంబీ ఎంటర్‌టైన్‌మెంట్‌, ఎ ప్లస్‌ ఎస్‌ మూవీస్‌ సహకారంతో సోనీ పిక్చర్స్‌ ఫిల్మ్స్‌ ఇండియా సంస్థ నిర్మిస్తోంది. ఇప్పటికే ముగింపు   దశకు చేరుకున్న ఈ సినిమా.. శనివారం నుంచి ఆఖరి షెడ్యూల్‌ను ప్రారంభించుకుంది. ఈ విషయాన్ని చిత్ర బృందం సామాజిక మాధ్యమాల వేదికగా తెలియజేసింది. ఈ సందర్భంగా అడివి శేష్‌ ట్విటర్‌ ద్వారా స్పందిస్తూ.. ‘‘మేజర్‌ సందీప్‌ ఉన్నికృష్ణన్‌గా నా ప్రయాణం దాదాపు పూర్తయింది. ఈ షెడ్యూల్‌ తర్వాత.. నేను అతని ఆరాధకుడిగా తిరిగి వెళ్తాను’’ అన్నారు. ఈ సినిమాని తెలుగుతో పాటు హిందీలోనూ ఏకకాలంలో తెరకెక్కిస్తున్నారు. శోభితా, సయీ మంజ్రేకర్‌ కథానాయికలు. ప్రకాశ్‌ రాజ్‌, రేవతి, మురళీ శర్మ ముఖ్య పాత్రలు పోషిస్తున్నారు. శ్రీచరణ్‌ పాకాల స్వరాలందిస్తున్నారు. వంశి పచ్చిపులుసు ఛాయాగ్రాహకుడిగా వ్యవహరిస్తున్నారు.