Ghani: గని.. ఇది కని విని ఎరగని..!

హైదరాబాద్‌: కెరీర్‌ ఆరంభం నుంచి విభిన్న కథా చిత్రాలను ఎంచుకుని ఇండస్ట్రీలో తనకంటూ ప్రత్యేకమైన పేరు సొంతం చేసుకున్నారు హీరో వరుణ్‌ తేజ్‌. ‘గద్దలకొండ గణేశ్‌’ వంటి ఫుల్‌ మాస్‌ యాక్షన్‌ ఎంటర్‌టైనర్‌ తర్వాత ఆయన నటిస్తున్న చిత్రం ‘గని’. స్పోర్ట్స్‌ డ్రామాగా ఈ సినిమా రూపుదిద్దుకుంటోంది. ఇందులో వరుణ్‌ తేజ్‌ బాక్సర్‌గా కనిపించనున్నారు. బుధవారం ఉదయం ఈ సినిమా నుంచి ఫస్ట్‌ సింగిల్‌ను చిత్రబృందం విడుదల చేసింది. ‘గని ఆంథమ్‌’ పేరుతో విడుదలైన ఈ పాట ప్రతిఒక్కరిలో స్పూర్తి నింపేలా ఉంది. బాక్సర్‌గా వరుణ్‌తేజ్‌ ప్రయాణాన్ని ఈ పాటలో చిత్రీకరించారు.

కిరణ్‌ కొర్రపాటి దర్శకత్వం వహిస్తున్న ఈ సినిమా కోసం వరుణ్‌ తేజ్‌ ఫిట్‌నెస్‌ విషయంలో ఎన్నో జాగ్రత్తలు పాటించారు. బాక్సింగ్‌లో శిక్షణ పొందారు. బాలీవుడ్‌ నటుడు సునీల్‌ శెట్టి ఈ సినిమాలో వరుణ్‌ తేజ్‌..  శిక్షకుడి పాత్రలో కనిపించనున్నారు. ఉపేంద్ర ప్రతినాయకుడి పాత్రలో కనిపించనున్నారు. వరుణ్‌కు జోడీగా సాయీ మంజ్రేకర్‌ కథానాయిక పాత్ర పోషిస్తున్నారు. తమన్‌ స్వరాలు అందిస్తున్నారు. అల్లు అరవింద్‌ సమర్పణలో ‘అల్లు బాబీ కంపెనీ’ పతాకంపై అల్లు బాబీ ఈ చిత్రాన్ని నిర్మిస్తున్నారు. శరవేగంగా చిత్రీకరణ జరుపుకుంటోన్న ఈ చిత్రం డిసెంబర్‌ 3న ప్రేక్షకుల ముందుకు రానుంది.