Bigg Boss 5: సన్నీ.. నువ్వేమైనా హీరోవా? ఇమిటేట్ చేయకంటూ సిరి చిందులు

ఇంటర్నెట్‌డెస్క్‌: బిగ్‌బాస్‌ తెలుగు సీజన్‌-5 ముగింపునకు వచ్చింది. ఈ క్రమంలో హౌస్‌లో ఉన్న టాప్‌-5 కంటెస్టెంట్‌లకు సరదాగా టాస్క్‌లు ఇచ్చి ఆడిస్తున్నాడు బిగ్‌బాస్‌. పగిలిపోయే వరకూ బెలూన్‌లలో గాలి కొట్టాలని ఆదేశించాడు. ఈ టాస్క్‌లో షణ్ముఖ్‌ విజయం సాధించాడు.  ఈ సందర్భంగా కూల్‌ డ్రింక్‌ గెలుచుకున్నాడు. అయితే, అతడు అన్నీ బెలూన్లు పగలగొట్టలేదని సన్నీ ఆరోపించాడు. ‘ఫన్నీటాస్క్‌’ అని చెప్పినా, అలిగి కూర్చొన్నాడు. భోజనం చేసిన తర్వాత అందరం కలిసి తాగుదామని షణ్ముఖ్‌ చెప్పినా ‘గెలుచుకున్న తర్వాతే తాగుతా’ అని సన్నీ చెప్పడం గమనార్హం. ఆ తర్వాత టీషర్ట్‌లు వేసుకుని స్విమ్మింగ్‌ ఫూల్‌లో అటూ ఇటూ స్విమ్‌ చేయాలని బిగ్‌ బాస్‌ సూచించాడు. ఈ టాస్క్‌లో మానస్‌ విజయం సాధించి చాకెట్లు సొంతం చేసుకున్నాడు. 

ఆ తర్వాత సన్నీ షణ్ముఖ్‌, శ్రీరామ్‌ క్రికెట్‌ ఆడారు.  బంతి ఇంటిపైకి కొట్టడంతో దాన్ని తీసేందుకు అక్కడే ఉన్న టేబుల్స్‌ సాయంతో ఇంటిపైకి ఎక్కేందుకు ప్రయత్నించారు. దీంతో అందరినీ పిలిచి బిగ్‌బాస్‌ చివాట్లు పెట్టాడు. ఫినాలే ముందు సాహసాలు చేయటం, ఇంటిపైకి ఎక్కడ మంచికాదని హెచ్చరించాడు. ముఖ్యంగా అజాగ్రత్త ఉండకూడదని సూచించాడు. ఈ ముగ్గురూ చేసిన పనికి గార్డెన్‌ ఏరియాను శుభ్ర పరచాల్సిందిగా శిక్ష విధించాడు. టైమ్‌ కౌంటింగ్‌ టాస్క్‌ ఇవ్వగా, 13 నిమిషాలకు దగ్గరగా బెల్‌ కొట్టిన షణ్ముఖ్ విజయం సాధించాడు. ఈ సందర్భంగా సన్నీ చేసిన అల్లరి నవ్వులు పూయించింది. ఇక సౌండ్‌లు విని పేర్లు రాయమని చెప్పగా, ఈ టాస్క్‌లో శ్రీరామ్‌ విజయం సాధించాడు.

రోప్‌ టాస్క్‌ అయింది రచ్చ రచ్చ..

చివరిగా రోప్‌ టాస్క్‌ ఇవ్వగా, ఇందులో సన్నీ విజయం సాధించాడు. అయితే, సన్నీ సరిగా ఆడలేదని సిరి ఆరోపించింది.  దీంతో ‘నువ్వు ఓడిపోయావు కదా మాట్లాడొద్దు’ అని సన్నీ అన్నాడు. అలా వీరిద్దరి మధ్య మొదలైన వాగ్వాదం చినికి చినికి మాటల యుద్ధానికి దారితీసింది. ‘సరదాగా అన్నాను’ అని సన్నీ చెప్పే ప్రయత్నం చేసినా ‘షణ్ముఖ్ బాగా ఆడాడు. అతడే గెలిచినట్టు’ అంటూ సిరి వాగ్వాదానికి దిగింది. బెడ్‌రూమ్‌లో పడుకుని ఉన్న సిరికి నచ్చజెప్పేందుకు ప్రయత్నించినా వినకుండా గట్టి గట్టిగా అరవడం మొదలు పెట్టింది. సన్నీ కూడా గొడవను పొడిగించాడు. ఇంతలో మానస్‌వచ్చి సన్నీని కిచెన్‌లోకి తీసుకెళ్లాడు. మరోవైపు సిరికి షణ్ముఖ్‌ సర్ది చెప్పే ప్రయత్నం చేసినా, ఆమె వినలేదు.