Pawan Kalyan: ‘భీమ్లా నాయక్‌’ పాటపై పోలీసు అధికారి అభ్యంతరం!

హైదరాబాద్‌: ప్రముఖ నటుడు పవన్‌ కల్యాణ్‌ హీరోగా తెరకెక్కుతోన్న చిత్రం ‘భీమ్లా నాయక్‌’. పవన్‌ కల్యాణ్‌ పుట్టినరోజు సందర్భంగా ఈ సినిమా టైటిల్‌ గీతాన్ని చిత్రబృందం గురువారం విడుదల చేసింది. కథానాయకుడి పాత్రని అభివర్ణిస్తూ చాలా పవర్‌ఫుల్‌గా సాగే ఈ పాట శ్రోతల్ని విశేషంగా ఆకట్టుకుంది. విడుదలైన కొన్ని గంటల్లోనే యూట్యూబ్‌లో రికార్డు సృష్టించింది. మరోవైపు ఈ పాటపై అభ్యంతరాలూ వ్యక్తం అవుతున్నాయి. పోలీసుల గురించి ఈ పాటలో వివరించిన తీరు బాగాలేదని హైదరాబాద్‌ ఈస్ట్‌జోన్‌ డి.సి.పి. రమేశ్ ఆరోపించారు. ఈ మేరకు ఆయన ట్వీట్‌ చేశారు. ‘మేం (తెలంగాణ పోలీసులు) ఫ్రెండ్లీ పోలీసులం. ప్రజలకి రక్షణ కల్పించేందుకు జీతాలు తీసుకునే మేం వారి ఎముకల్ని విరగ్గొట్టం. పోలీసుల గొప్పతనాన్ని చెప్పేందుకు రచయిత రామజోగయ్యశాస్త్రికి తెలుగులో ఇంతకన్నా మంచి పదాలు దొరకలేదేమో! ఈ పాటలో పోలీసుల సేవల గురించి తెలుపలేదు’ అని పేర్కొన్నారు. దీనిపై నెటిజన్లు భిన్నాభిప్రాయాలు వ్యక్తం చేస్తున్నారు. కొందరు సమర్థిస్తుంటే మరికొందరు ‘అది సినిమా సర్‌’ అంటూ కామెంట్లు పెడుతున్నారు.

ఈసారి బాగా రాస్తా: రామజోగయ్యశాస్త్రి

ఈ పాట గురించి ఓ నెటిజన్‌ పెట్టిన ట్వీట్‌కి రామజోగయ్యశాస్త్రి స్పందించారు. ‘మీ స్థాయి సాహిత్యం కాదు అన్న’ అని సదరు నెటిజన్‌ అనగా ‘ఈసారి బాగా రాస్తా తమ్ముడు ప్లీజ్‌’ అని సమాధానం ఇచ్చారు.