Vijay Sethupathi: కృతిశెట్టితో సినిమా చేయలేను: విజయ్‌ సేతుపతి

హైదరాబాద్‌: కృతిశెట్టితో తాను సినిమా చేయలేనని ప్రముఖ నటుడు విజయ్‌ సేతుపతి అన్నారు. కృతిశెట్టి-వైష్ణవ్‌ తేజ్‌ జంటగా నటించిన ‘ఉప్పెన’ చిత్రంలో విజయ్‌ సేతుపతి ఆమె తండ్రి పాత్రలో కనిపించారు. ఆ సినిమాలో విజయ్‌ నెగెటివ్‌ షేడ్స్‌ ఉన్న పాత్ర పోషించారు. కాగా, తాజాగా ‘లాభం’ సినిమా ప్రమోషన్స్‌లో భాగంగా ఓ ఛానల్‌కు ఇచ్చిన ఇంటర్వ్యూలో విజయ్‌ ఆసక్తికర విశేషాలు పంచుకున్నారు. తాను కథానాయకుడిగా చేయనున్న ఓ సినిమాలో కృతిశెట్టిని హీరోయిన్‌గా ఎంపిక చేశారని అన్నారు.

‘‘ఉప్పెన’లో బేబమ్మ(కృతిశెట్టి) తండ్రి పాత్రలో నటించి తెలుగువారికి చేరువయ్యాను. ఆ సినిమా విడుదలైన కొన్ని నెలల తర్వాత తమిళంలో ఓ ప్రాజెక్ట్‌ చేశాను. అందులో కథానాయికగా కృతిశెట్టిని ఎంచుకుంటే బాగుంటుందని టీమ్‌ భావించి.. ఆమె ఫొటో నాకు పంపించారు. నేను వెంటనే వాళ్లకు ఫోన్‌ చేసి.. ‘ఇటీవల ఓ సినిమాలో నేను ఆమెకు తండ్రిగా నటించాను. కూతురు పాత్ర పోషించిన ఆమెతో రొమాన్స్‌ చేయలేను. కాబట్టి ఆమె వద్దు’ అని చెప్పాను. ‘ఉప్పెన’ క్లైమాక్స్‌ షూట్‌ చేస్తున్నప్పుడు ఆమె కొంచెం కంగారు పడింది. దాంతో నేను.. ‘బేబమ్మ.. నాకు నీ వయసు కొడుకే ఉన్నాడు. కాబట్టి నువ్వు కూడా నా కూతురు లాంటి దానివే. భయపడకు. ఎలాంటి కంగారు లేకుండా ధైర్యంగా చెయ్‌’ అని ప్రోత్సహించాను. కూతురిలా భావించిన ఆమెకు జోడీగా నటించడం నా వల్ల కాదు’’ అని విజయ్‌ సేతుపతి వివరించారు.

ఇక, ‘లాభం’ సినిమా విషయానికి వస్తే.. వ్యవసాయం, దళారీ వ్యవస్థ, రైతులు ఎదుర్కొంటున్న ఇబ్బందులు తెలియజేసే విధంగా ఈ సినిమా తెరకెక్కింది. ఇందులో విజయ్‌ రైతు సమస్యలపై పోరాడే వ్యక్తిగా కనిపిస్తారు. శ్రుతిహాసన్‌ కథానాయిక. ఎస్‌.పి.జననాథన్‌ దర్శకుడు. ఇమాన్‌ సంగీతం అందించారు. సెప్టెంబర్‌ 9న తెలుగు, తమిళ భాషల్లో విడుదల కానుంది.