Chiranjeevi: చిరంజీవికి జోడీగా?

నటి శ్రుతిహాసన్‌ తెలుగులో మళ్లీ బిజీ అవుతోంది. ఓవైపు ప్రభాస్‌తో కలిసి ‘సలార్‌’లో సందడి చేస్తున్న ఈ అమ్మడు.. మరోవైపు బాలకృష్ణ చిత్రంలోనూ నటించేందుకు అంగీకారం తెలిపింది. ఇప్పుడామె చిరంజీవి సరసన నటించే అవకాశం దక్కించుకున్నట్లు సమాచారం అందుతోంది. ప్రస్తుతం చిరు హీరోగా బాబీ దర్శకత్వంలో ఓ సినిమా రూపొందుతోన్న సంగతి తెలిసిందే. మైత్రీ మూవీ మేకర్స్‌ సంస్థ నిర్మిస్తోంది. మాస్‌ యాక్షన్‌ ఎంటర్‌టైనర్‌గా తెరకెక్కుతోన్న ఈ చిత్రం కోసం చిత్ర బృందం శ్రుతిని సంప్రదించినట్లు తెలిసింది. చిత్ర కథ.. ఆమె పాత్ర నచ్చడంతో ఈ సినిమా చేసేందుకు శ్రుతిహాసన్‌ అంగీకరించినట్లు సమాచారం. త్వరలో దీనిపై అధికారిక ప్రకటన వెలువడనున్నట్లు ప్రచారం వినిపిస్తోంది. ప్రస్తుతం శరవేగంగా చిత్రీకరణ జరుపుకుంటోన్న ఈ చిత్రం కోసం ‘వాల్తేరు వీరయ్య’ అనే టైటిల్‌ పరిశీలనలో ఉంది.