Suma: సుమ.. పంచాయితీ

బుల్లితెర వ్యాఖ్యాతగా ప్రేక్షకుల్లో ప్రత్యేక గుర్తింపు సాధించుకున్న సుమ కనకాల.. ఇప్పుడు ‘జయమ్మ పంచాయితీ’ అనే చిత్రంతో వెండితెరపై సందడి చేయనుంది. కలివారపు విజయ్‌ కుమార్‌ తెరకెక్కిస్తున్న ఈ  సినిమాని బలగ ప్రకాష్‌ నిర్మిస్తున్నారు. ఎం.ఎం.కీరవాణి  స్వరాలందిస్తున్నారు. ఈ చిత్ర టైటిల్‌, ఫస్ట్‌లుక్‌ను హీరో రామ్‌చరణ్‌ శనివారం విడుదల చేశారు. ఆ పోస్టర్‌లో సుమ పాత కాలం నాటి రోలు ముందు కూర్చొని సీరియస్‌గా  రోకలితో పోటేస్తూ కనిపించారు. ఆమె దెబ్బకు రోలు పగుళ్లు రావడాన్ని పోస్టర్‌లో చూడొచ్చు. అలాగే ఆమె చీర కొంగుపై ఓ గ్రామీణ వాతావరణాన్ని.. ఆ ఊరిలోని ప్రజల్ని చూపించారు. ఈ ప్రచార చిత్రాన్ని తీర్చిదిద్దిన తీరును బట్టి.. ఇందులో సుమ పాలకొండ అనే గ్రామ పెద్దగా కనిపించనున్నట్లు తెలుస్తోంది. మరి ఆ ఊరిలో ఈ జయమ్మ పంచాయితీ ఏంటో తెలియాలంటే.. ఇంకొన్నాళ్లు వేచి చూడక తప్పదు. ఈ సినిమా ప్రస్తుతం తుది దశ చిత్రీకరణలో ఉంది. త్వరలో విడుదల తేదీ ప్రకటిస్తామని నిర్మాతలు తెలియజేశారు. ఈ చిత్రానికి కూర్పు: రవితేజ గిరిజాల, ఛాయాగ్రహణం: అనుష్‌ కుమార్‌.