Seetimaarr: గోపీచంద్‌, తమన్నా మాస్‌ బీట్‌.. ‘జ్వాలారెడ్డి’ ఫుల్‌ వీడియో వచ్చేసింది!

ఇంటర్నెట్‌ డెస్క్‌: సంగీత అభిమానుల్ని ఉర్రూతలూగించిన గీతాల్లో ‘జ్వాలారెడ్డి’ ఒకటి. ఈ పాట లిరికల్‌ వీడియో విడుదలైన రోజు నుంచే యూట్యూబ్‌లో విశేష స్పందన లభించింది. మాస్‌ బీట్‌ కావడం, గోపీచంద్‌, తమన్నా కెమిస్ట్రీ అద్భుతంగా పండటమే ఇందుకు కారణం. ఫుల్‌ వీడియో ఎప్పుడొస్తుందా? అని ఆసక్తిగా ఎదురుచూస్తోన్న ప్రేక్షకులకి చిత్ర బృందం తాజాగా ఆ సర్‌ప్రైజ్‌ అందించింది. ఈ గీతానికి కాసర్ల శ్యామ్‌ సాహిత్యం అందించగా మణిశర్మ స్వరాలు సమకూర్చారు. శంకర్‌ బాబు, మంగ్లీ ఆలపించారు.

కబడ్డీ నేపథ్యంలో రూపొందిన ఈ సినిమా వినాయక చవితి కానుకగా సెప్టెంబరు 10న విడుదలై మంచి విజయం అందుకుంది. ప్రస్తుతం ‘డిస్నీ+ హాట్‌స్టార్‌’ వేదికగా అలరిస్తోంది. ఈ సినిమాలో గోపీచంద్‌ (కార్తీక్‌), తమన్నా (జ్వాలారెడ్డి) కబడ్డీ కోచ్‌లుగా నటించారు. భూమిక, దిగంగన సూర్యవంశీ, పోసాని తదితరులు కీలక పాత్రలు షోషించారు. సంపత్‌ నంది దర్శకత్వం వహించిన ఈ చిత్రాన్ని శ్రీనివాసా సిల్వర్‌ స్క్రీన్‌ పతాకంపై శ్రీనివాసా చిట్టూరి నిర్మించారు.