Kinnerasani: ఉత్కంఠగా ‘కిన్నెరసాని’ టీజర్‌

ఇంటర్నెట్‌ డెస్క్‌: కల్యాణ్ దేవ్‌ కథానాయకుడిగా రమణ్‌ తేజ తెరకెక్కిస్తున్న చిత్రం ‘కిన్నెరసాని’. శీతల్‌ కథానాయిక. ఈ సినిమా టీజర్‌ నటుడు నితిన్‌ శుక్రవారం విడుదల చేశారు. ఓ బీచ్‌ సన్నివేశంతో ప్రారంభమైన ఈ టీజర్‌ ఆద్యంతం ఆసక్తిగా సాగింది. ‘అద్భుతం జరిగే ప్రతిచోటా ఆపదలుంటాయి’, ‘ఈ ప్రపంచంలో ప్రతిదానికీ ఓ లిమిట్‌ ఉండాలి. అది ద్వేషానికైనా.. చివరకి ప్రేమకైనా’ అనే సంభాషణలు ప్రధానంగా నిలిచాయి. నటీనటుల హావభావాలు, లొకేషన్లు ఆకట్టుకునేలా ఉన్నాయి. నేపథ్య సంగీతం ప్రధాన బలంగా నిలిచింది. ప్రచార చిత్రాన్ని బట్టి చూస్తుంటే క్రైమ్‌, సస్పెన్స్‌ అంశాలతో ఈ సినిమాని రూపొందిస్తున్నట్టు అర్థమవుతోంది. ఎస్‌.ఆర్‌.టి. ఎంటర్‌టైన్‌మెంట్స్‌, శుభమ్‌ ఎంటర్‌టైన్‌మెంట్స్‌ సంస్థలు సంయుక్తంగా ఈ చిత్రాన్ని నిర్మిస్తున్నాయి. మహతి సాగర్‌ సంగీతం అందిస్తున్నారు. ప్రముఖ నటుడు చిరంజీవి చిన్నల్లుడైన కల్యాణ్‌దేవ్‌.. ‘విజేత’ చిత్రంతో నటుడిగా మారిన సంగతి తెలిసిందే.