Lakshya: లక్ష్య ఫస్ట్‌ సాంగ్‌ వచ్చేసింది

హైదరాబాద్‌: ‘వరుడు కావలెను’ వంటి ఫ్యామిలీ ఎంటర్‌టైనర్‌తో విజయాన్ని తన ఖాతాలో వేసుకున్న నాగశౌర్య హీరోగా నటిస్తున్న సరికొత్త చిత్రం ‘లక్ష్య’.  ఫ్యామిలీ, లవ్‌ ఎంటర్‌టైనర్లతో ప్రేక్షకులను అలరించిన శౌర్య.. ఈ సినిమా ద్వారా మొదటిసారి స్పోర్ట్స్‌ డ్రామాలో నటిస్తున్నారు. ఆర్చరీ నేపథ్యంలో సాగే ఈ చిత్రానికి ధీరేంద్ర సంతోష్‌ జాగర్లపూడి దర్శకత్వం వహిస్తున్నారు. త్వరలో ఈ సినిమా ప్రేక్షకుల ముందుకు రానుంది. ఈ నేపథ్యంలో శనివారం ‘లక్ష్య’ నుంచి ఫస్ట్‌ సాంగ్‌ని చిత్రబృందం విడుదల చేసింది. ‘అరచేతుల్లో దాచి వెలిగించే దీపం తానే’ అంటూ సాగే ఈ పాట మనసుని హత్తుకునేలా ఉంది. ప్రస్తుతం శరవేగంగా చిత్రీకరణ జరుపుకుంటోన్న ఈ సినిమాలో జగపతిబాబు.. నాగశౌర్య తండ్రి పాత్ర పోషించారు. శౌర్యకు జోడీగా కేతికాశర్మ నటించారు. కాలభైరవ స్వరాలు సమకూర్చారు. నారాయణ్‌ దాస్‌ నారంగ్‌, రామ్మోహన్‌ ఈ చిత్రాన్ని నిర్మిస్తున్నారు.