Lavanya Tripati: లావణ్య.. ‘హ్యాపీ బర్త్‌డే’

‘మత్తు వదలరా’ చిత్రంతో తొలి ప్రయత్నంలోనే విజయాన్ని అందుకున్న దర్శకుడు రితేష్‌ రానా. ఇప్పుడాయన రెండో సినిమాని మైత్రీ మూవీస్‌ మేకర్స్‌, క్లాప్‌ ఎంటర్‌టైన్‌మెంట్స్‌ సంస్థలు సంయుక్తంగా నిర్మిస్తున్నాయి. లావణ్య త్రిపాఠి ప్రధాన పాత్రలో నటిస్తోంది. ఈ చిత్రానికి ‘హ్యాపీ బర్త్‌డే’ అనే టైటిల్‌ ఖరారు చేశారు. బుధవారం లావణ్య పుట్టినరోజు సందర్భంగా ఈ చిత్ర టైటిల్‌, ఫస్ట్‌లుక్‌ను విడుదల చేశారు. ఈ ప్రచార చిత్రంలో లావణ్య మిషన్‌ గన్‌ పట్టుకుని ఫైరింగ్‌ చేస్తూ కనిపించింది. పోస్టర్‌ బ్యాగ్రౌండ్‌లో ‘నో గన్‌.. నో ఎంట్రీ’ అంటూ ఓ బోర్డును చూపించారు. ఈ సందర్భంగా నిర్మాతలు మాట్లాడుతూ.. ‘‘ఈ సినిమాతో రితేష్‌ ప్రేక్షకులకు పసందైన వినోదం అందించనున్నారు. ప్రస్తుతం రెగ్యులర్‌ చిత్రీకరణ శరవేగంగా సాగుతోంది’’ అన్నారు. దీనికి కాల భైరవ స్వరాలందిస్తున్నారు. సురేష్‌ సారంగం ఛాయాగ్రాహకుడు.