Liger: ‘లైగర్‌’ మంట

మంట పుట్టిద్దాం... అంటూ సందడి చేస్తున్నారు విజయ్‌ దేవరకొండ - పూరి జగన్నాథ్‌. ఈ ఇద్దరి కలయికలో ‘లైగర్‌’ రూపొందుతున్న సంగతి తెలిసిందే. విడుదల ఎప్పుడెప్పుడా అని దేశవ్యాప్తంగా ప్రేక్షకుల్లో ఆసక్తిని రేకెత్తిస్తున్న ఈ సినిమాకి సంబంధించి రెండు ముఖ్యమైన తేదీల్ని ప్రకటించాయి చిత్రవర్గాలు. ఒకటి సినిమా విడుదల తేదీ కాగా, మరొకటి ప్రచార చిత్రం విడుదల తేదీ. పాన్‌ ఇండియా స్థాయిలో రూపొందుతున్న ఈ సినిమా ఆగస్ట్‌ 25న విడుదల కానుంది. ‘అర్జున్‌రెడ్డి’  అదే తేదీనే విడుదలైంది. ఫస్ట్‌ గ్లిమ్స్‌ ప్రచార చిత్రాన్ని ఈ నెల 31న విడుదల చేస్తున్నట్టు    ప్రకటించాయి సినీ వర్గాలు. విజయ్‌ దేవరకొండ, అనన్య పాండే జోడీగా పూరి జగన్నాథ్‌ దర్శకత్వంలో ‘లైగర్‌’ తెరకెక్కుతున్న సంగతి తెలిసిందే. సాలా క్రాస్‌ బ్రీడ్‌... అనేది ఉపశీర్షిక. బాక్సింగ్‌ దిగ్గజం మైక్‌ టైసన్‌ ఓ ముఖ్య పాత్రని పోషిస్తున్నారు. కరణ్‌ జోహార్‌, అపూర్వ మెహతా, ఛార్మి కౌర్‌తో కలిసి పూరి జగన్నాథ్‌ నిర్మిస్తున్నారు. మిక్స్‌డ్‌ మార్షల్‌ ఆర్ట్స్‌ ఇతివృత్తంగా... భారతదేశంలోని అతి పెద్ద యాక్షన్‌ చిత్రంగా రూపొందుతోంది. ఇటీవలే అమెరికాలో నాయకానాయికలు, మైక్‌ టైసన్‌ నేపథ్యంలో కీలక సన్నివేశాల్ని చిత్రీకరించారు. భారతదేశంలో తెరకెక్కించాల్సిన ఓ చిన్న షెడ్యూల్‌ మినహా చిత్రీకరణ పూర్తయినట్టు సినీ వర్గాలు తెలిపాయి. ‘‘ఈ కొత్త ఏడాది... మంట పుట్టిద్దాం’’ అంటూ నిర్మాతలు సినిమా, ప్రచార చిత్రాల విడుదల తేదీల్ని ప్రకటించారు. రమ్యకృష్ణ, రోనిత్‌ రాయ్‌, విష్ణురెడ్డి, అలీ, మకరంద్‌ దేశ్‌పాండే, గెటప్‌ శ్రీను తదితరులు నటిస్తున్న ఈ చిత్రానికి ఛాయాగ్రహణం: విష్ణు శర్మ, పోరాటాలు: కెచ్చా, కళ: జానీ షేక్‌ బాషా.