MAA Elections: ‘మా’ ఎన్నికల ఫలితాలు రేపే..!

హైదరాబాద్‌: మూవీ ఆర్టిస్ట్స్‌ అసోసియేషన్‌ ‘మా’ ఎన్నికల ఫలితాలు రేపు రాత్రికే ప్రకటించే అవకాశం ఉందని ఎన్నికల సహాయ అధికారి నారాయణరావు వెల్లడించారు. అక్టోబర్‌ 10న నిర్వహించనున్న ‘మా’ పోలింగ్‌ కోసం జూబ్లీహిల్స్‌ పబ్లిక్‌ స్కూల్‌లో అధికారులు ఏర్పాట్లు పూర్తి చేశారు. ఈ నేపథ్యంలో ఎన్నికల కోసం చేసిన ఏర్పాట్లపై శనివారం ఉదయం నారాయణరావు సమీక్ష నిర్వహించారు. ప్రకాశ్‌రాజ్‌, మంచు విష్ణులకు పోలింగ్ ప్రక్రియ గురించి వివరించారు. ఆదివారం ఉదయం 8 గంటల నుంచి మధ్యాహ్నం 2 గంటల వరకు పోలింగ్‌ జరగనుందని.. సాయంత్రం 4 గంటలకు ఓట్ల లెక్కింపు ఉంటుందని ఆయన తెలిపారు. ఓట్ల లెక్కింపు పూర్తైన వెంటనే అదే రోజు రాత్రి ఫలితాలు కూడా ప్రకటించే  అవకాశం ఉందని ఆయన వివరించారు. ఎన్నడూ లేని విధంగా ఈ సారి ‘మా’ అధ్యక్ష ఎన్నికలు తెలుగు రాష్ట్రాల్లో చర్చనీయాంశంగా మారాయి. అధ్యక్ష పదవి కోసం ప్రకాశ్‌రాజ్‌, మంచు విష్ణు హోరాహోరీగా తలపడుతున్నారు.