Pushpa: అల్లు అర్జున్‌ ‘పుష్ప’.. తెర వెనక ఎంత కష్టపడ్డారో..!

ఇంటర్నెట్‌ డెస్క్‌: అల్లు అర్జున్‌లోని పూర్తిస్థాయి మాస్‌ కోణాన్ని చూపించిన చిత్రం ‘పుష్ప’. సుకుమార్‌ దర్శకత్వం వహించిన ఈ సినిమా ఇటీవల విడుదలై విశేష ప్రేక్షకాదరణ పొందుతోంది. ఈ నేపథ్యంలో చిత్ర బృందం మేకింగ్‌ వీడియోను సోషల్ మీడియా వేదికగా ఆదివారం విడుదల చేసింది. యాక్షన్ సీన్లు, పాటలకు సంబంధించిన చిత్రీకరణ ఎలా సాగిందో ఇందులో చూడొచ్చు. అడవిలో సెట్స్‌ ఎలా రూపొందించారో, నటులు, దర్శకుడి మధ్య సంభాషణలు ఎలా సాగాయో ఈ వీడియో చూస్తే అర్థమవుతుంది. ఈ సినిమా చిత్రీకరణను చూసేందుకు విచ్చేసిన దర్శకుడు వి.వి. వినాయక్‌, అల్లు అర్జున్‌ తనయ అర్హ సరదాల్నీ ఈ వీడియోలో బంధించారు.

‘ఆర్య’, ‘ఆర్య 2’ వంటి ప్రేమకథల తర్వాత సుకుమార్‌- అల్లు అర్జున్‌ కాంబినేషన్‌లో తెరకెక్కింది ‘పుష్ప’. కథానాయికగా రష్మిక, ప్రతినాయకులుగా సునీల్‌, ఫహద్‌ ఫాజిల్‌ ఆకట్టుకున్నారు. దేవిశ్రీ ప్రసాద్‌ సంగీతం ఉర్రూతలూగించింది. మైత్రీ మూవీ మేకర్స్‌, ముత్తంశెట్టి మీడియా సంస్థలు నిర్మించిన ఈ చిత్రం తెలుగుతోపాటు తమిళం, మలయాళం, కన్నడ, హిందీ భాషల్లోనూ విడుదలైంది. ఈ సినిమా రెండో భాగం వచ్చే ఏడాదిలో ప్రారంభంకానుంది. 

► Read latest Cinema News and Telugu News