Shyam Singha Roy: ‘సిరివెన్నెల’తో పనిచేయడం వెలకట్టలేని జ్ఞాపకం: మిక్కీ జే మేయర్‌

హైదరాబాద్‌: ‘సిరివెన్నెల’ లాంటి లెజెండ్‌తో ప‌నిచేసే అవ‌కాశం రావ‌డం నిజంగా తన అదృష్టమని యువ సంగీత దర్శకుడు మిక్కీ జే మేయర్‌ (Mickey J Meyer) అన్నారు. ఆయన సంగీతం అందించిన చిత్రం ‘శ్యామ్‌ సింగరాయ్‌’ (Shyam Singha Roy). నాని (Nani) కథానాయకుడు. రాహుల్‌ సాంకృత్యన్‌ దర్శకుడు. సాయిపల్లవి (Sai pallavi), కృతిశెట్టి, మడోనా సెబాస్టియన్‌ కథానాయికలు. అన్ని కార్యక్రమాలు పూర్తి చేసుకున్న ఈ సినిమా డిసెంబరు 24న ప్రేక్షకుల ముందుకు రానుంది. ఈ సందర్భంగా మిక్కీ జే మేయర్‌ పంచుకున్న విశేషాలు..

* ‘శ్యామ్ సింగరాయ్’ కథ రెండు టైమ్ పీరియడ్స్‌కు సంబంధించింది. 70వ దశకంలోని వాతావరణాన్ని ఇందులో చూపించనున్నారు. దానికి తగ్గట్టే సంగీతం, నేప‌థ్య సంగీతం అందించా.

* నాకు భారతీయ సంగీత వాయిద్య పరికరాలపై మంచి నాలెడ్జ్ ఉంది. కాబ‌ట్టి ఆ కాలంలో ఉపయోగించిన వాయిద్యాలనే ఇందులో ఎక్కువ‌గా వాడాను. కోల్‌కతా నేపథ్యం, కథకు తగ్గట్టుగానే మ్యూజిక్ ఇచ్చాను. టాలీవుడ్‌లో ఇలాంటి నేపథ్యంలో రాబోతోన్న మొదటి సినిమా ఇదే అవుతుంది.

* దర్శకుడు రాహుల్ ఈ క‌థ చెప్పగానే చాలా కొత్తగా ఫీలయ్యా. ఇలాంటి కథకు మంచి సంగీతం అందించే అవకాశం పుష్కలంగా ఉంది. ఇప్పటికే విడుదలైన పాటలకు మంచి స్పందన వస్తోంది. సినిమా విడుదలయ్యాక పాటలు, నేపథ్య సంగీతానికి ఇంకా మంచి స్పందన వస్తుందని ఆశిస్తున్నా!

* సిరివెన్నెల లాంటి లెజెండ్‌తో ప‌నిచేసే అవ‌కాశం రావ‌డం నిజంగా నా అదృష్టం. ఆయ‌న‌తో గ‌డిపిన సమయం వెలకట్టలేని జ్ఞాపకం. ఈ సినిమా కోసం ఆయ‌న రెండు పాటలు రాశారు. అందులో సిరివెన్నెల‌ పాటకు మంచి స్పందన లభిస్తోంది. ఆయన రాసిన మరో పాట త్వరలోనే విడుదలవుతుంది. ఆ పాట‌లో సిరివెన్నెల సాహిత్యం అద్భుతంగా ఉంటుంది.

* పాట ఏ సింగ‌ర్‌తో పాడించాలి అనే విష‌యంలో హీరో, దర్శకుల నుంచి నేను సలహాలు తీసుకుంటా. కానీ, తుది నిర్ణయం మాత్రం నాదే. ఎందుకంటే ఆ పాట ట్యూన్ చేసేట‌ప్పుడే అది ఎవ‌రు పాడితే బాగుంటుందనేది నిర్ణయించుకుంటా.

* ప్రస్తుతం నందినీరెడ్డి, స్వప్నా దత్ కాంబినేషన్‌లో ఓ సినిమాకు సంగీతం అందిస్తున్నాను. అలాగే శ్రీవాస్-గోపీచంద్ కాంబినేష‌న్‌లో ఒక  ప్రాజెక్ట్ ఉంది. దిల్ రాజుగారి బ్యానర్‌లో మరో సినిమాకు సంగీతాన్ని అందిస్తున్నా. వీటితో పాటు ఇంగ్లీష్, స్పానిష్ భాషల్లో ప్రైవేట్ ఆల్బమ్స్‌ కూడా చేస్తున్నాను.

► Read latest Cinema News and Telugu News