Narappa: నరకరా థీమ్‌ వచ్చేసింది..

హైదరాబాద్‌: అగ్రకథానాయకుడు వెంకటేశ్‌ ప్రధాన పాత్రలో నటించిన యాక్షన్‌ ఎంటర్‌టైనర్‌ ‘నారప్ప’. శ్రీకాంత్‌ అడ్డాల దర్శకత్వం వహించిన ఈ సినిమా ఇటీవల అమెజాన్‌ ప్రైమ్‌ వేదికగా విడుదలై ప్రేక్షకులను అలరిస్తోంది. ఈ నేపథ్యంలోనే తాజాగా ‘నారప్ప’ నుంచి ‘నరకరా’ థీమ్‌ సాంగ్‌ను చిత్రబృందం శుక్రవారం సోషల్‌మీడియా వేదికగా విడుదల చేసింది. ‘రా నరకరా నరకరా ఎదురుతిరిగి కసిగా.. తలలు ఎగిరిపడగా’ అంటూ సాగే ఈ పాట లిరికల్‌ వీడియో ఆకట్టుకునేలా ఉంది. మణిశర్మ స్వరాలు అందించగా.. రేవంత్‌, సాయి చరణ్‌, శ్రీ కృష్ణా ఈ పాటను అలపించారు. కోలీవుడ్‌లో బ్లాక్‌బస్టర్‌ విజయాన్ని నమోదు చేసుకున్న ‘అసురన్‌’ రీమేక్‌గా ‘నారప్ప’ రూపుదిద్దుకుంది. భూవివాదం వంటి సామాజిక, సాంఘిక అంశాలతో తెరకెక్కిన చిత్రమిది. ఇందులో వెంకటేశ్‌.. వృద్ధుడు, యువకుడిగా.. రెండు వేరియేషన్స్‌తో మెప్పించారు. ప్రియమణి కథానాయిక.