RRR: కొమురం భీముడో...

‘‘భీమా... నినుగన్న నేలతల్లి, ఊపిరి పోసిన సెట్టు సేమ, పేరు పెట్టిన గోండు జాతి నీతో మాట్లాడుతుర్రు. వినబడుతుందా?’’ అంటూ కొమురం భీమ్‌ కోసం ఓ పాట ఆరంభమైంది. కొమురం భీముడో... అంటూ తన  బిడ్డ గురించి నేలతల్లి, చెట్టు చేమ, గోండు జాతి ఏం చెప్పిందో, అతనిలో ఎలా స్ఫూర్తిని నింపిందో తెలియాలంటే ఈ... పాట వినాల్సిందే. ‘ఆర్‌.ఆర్‌.ఆర్‌’ చిత్రంలోని ఈ పాటకి సంబంధించిన వీడియోని శుక్రవారం విడుదల చేశారు. కీరవాణి స్వరకల్పనలో ఈ గీతాన్ని సుద్దాల అశోక్‌తేజ రచించగా, కాలభైరవ ఆలపించారు. ఎన్టీఆర్‌, రామ్‌చరణ్‌ కథా  నాయకులుగా నటిస్తున్న చిత్రమిది. ఎస్‌.ఎస్‌.రాజమౌళి దర్శకత్వం వహిస్తున్నారు. డి.వి.వి.దానయ్య నిర్మాత. ఈ చిత్రం జనవరి 7న ప్రేక్షకుల ముందుకొస్తోంది. ఈ చిత్రంలో ఎన్టీఆర్‌... కొమురం భీమ్‌గా నటించిన విషయం తెలిసిందే.