Anubhavinchu Raja: బంగారం మనసు అలాంటిది

‘వచ్చే సంవత్సరం ఇదే రోజు ఇక్కడే జెండా ఎగరేస్తా. బంగారంగా కాదు... ప్రెసిడెంట్‌ బంగారంగా’ అంటూ ఊర్లో శపథం చేశాడు. మరి అది సాధ్యమైందో లేదో తెలియాలంటే ‘అనుభవించు రాజా’ చూడాల్సిందే. రాజ్‌తరుణ్‌ కథానాయకుడిగా నటించిన చిత్రమిది. కశిష్‌ఖాన్‌ కథానాయిక. శ్రీను గవిరెడ్డి  దర్శకత్వం వహించారు. అన్నపూర్ణ స్టూడియోస్‌, శ్రీవెంకటేశ్వర సినిమాస్‌ సంయుక్తంగా రూపొందిస్తున్నాయి. సుప్రియ యార్లగడ్డ నిర్మాత. ఈ చిత్రం ఈ నెల 26న ప్రేక్షకుల ముందుకొస్తోంది. బుధవారం కథానాయకుడు నాగార్జున ట్రైలర్‌ని విడుదల చేశారు. ‘బంగారంగాడి మనసు సినిమాహాల్‌ లాంటిది. వారానికో సినిమా వస్తా ఉంటది. పోతా ఉంటది... ఏదీ పర్మనెంట్‌గా ఉండదు...’ అంటూ రాజ్‌తరుణ్‌ అల్లరి చేయడం ట్రైలర్‌కి ఆకర్షణగా నిలిచింది. సెక్యూరిటీ గార్డ్‌గా, ఊళ్లో జాలీగా తిరిగే కుర్రాడిగా రెండు కోణాల్లో కనిపించాడు రాజ్‌తరుణ్‌. పోసాని, నరేన్‌, అజయ్‌,    సుదర్శన్‌, అరియానా, భూపాల్‌రాజు, ఆదర్శ్‌ బాలృష్ణ, రవికృష్ణ, టెంపర్‌ వంశీ తదితరులు నటించిన ఈ సినిమాకి సంగీతం: గోపీసుందర్‌, ఛాయాగ్రహణం: నాగేష్‌ బానెల్‌.