Aasha Encounter: ఎన్‌కౌంటర్‌ వెనుక...

శ్రీకాంత్‌ అయ్యంగార్‌, సోనియా ఆకుల, ప్రవీణ్‌ రాజ్‌ ప్రధాన పాత్రధారులుగా నటించిన చిత్రం ‘ఆశా ఎన్‌కౌంటర్‌’. ఆనంద్‌చంద్ర దర్శకత్వం వహించారు. అనురాగ్‌ కంచర్ల నిర్మాత. ప్రముఖ దర్శకుడు రామ్‌గోపాల్‌ వర్మ చిత్రంగా జనవరి 1న ప్రేక్షకుల ముందుకొస్తోంది. రామ్‌గోపాల్‌ వర్మ మాట్లాడుతూ ‘‘ఒక యువతిపై జరిగిన సామూహిక అత్యాచారం, హత్య నేపథ్యంలో జరిగే కథ ఇది. ఆశా ఎన్‌కౌంటర్‌ వెనుక కారకులు ఎవరనే విషయాన్ని దర్శకుడు ఆసక్తికరంగా చెప్పారు. ఆనంద్‌ చంద్రకి దర్శకుడిగా మంచి పేరు వస్తుంద’’న్నారు. దర్శకులు మాట్లాడుతూ ‘‘అనేక వాస్తవ కథనాలతో ఈ చిత్రం చేశాం. ఈ నెల 25నే ప్రేక్షకుల ముందుకు తీసుకు రావాలనుకున్నాం. కానీ పాన్‌ ఇండియా చిత్రాల విడుదల వల్ల ఆలస్యంగా జనవరి 1న చిత్రాన్ని విడుదల చేస్తున్నాం’’ అన్నారు. వెంకట్‌, శ్రీధర్‌, ముని, నవీన్‌, కల్యాణ్‌, ప్రశాంతి తదితరులు నటించిన ఈ చిత్రానికి సంగీతం: ఆనంద్‌, ఛాయాగ్రహణం: జోషి.