Raviteja: అసుర.. ‘రావణాసుర’

ప్రస్తుతం రవితేజ చేతిలో నాలుగు చిత్రాలున్నాయి. వాటిలో సుధీర్‌ వర్మ తెరకెక్కించనున్న కొత్త సినిమా ఉంది. అభిషేక్‌ పిక్చర్స్‌, ఆర్‌టీ టీం వర్క్స్‌ సంయుక్తంగా నిర్మిస్తున్నాయి. రవితేజ 70వ చిత్రంగా రానున్న ఈ సినిమాకి ‘రావణాసుర’ అనే టైటిల్‌ ఖరారు చేశారు. శుక్రవారం ఫస్ట్‌లుక్‌ను విడుదల చేశారు. పోస్టర్‌లో రవితేజను పదితలల రావణుడిలా చూపించారు. ఆయన లాయర్‌ కోటు ధరించి.. ఓ చేత్తో రక్తంతో తడిసిన సుత్తి పట్టుకుని సీరియస్‌ లుక్‌లో ఉన్నారు. ‘‘హీరోలు అనే వాళ్లు ఉండరు’’ అంటూ పోస్టర్‌పై ఓ వ్యాఖ్యను జోడించారు. ప్రచార చిత్రాన్ని బట్టి.. ఇదొక యాక్షన్‌ థ్రిల్లర్‌ కథాంశంతో రూపొందనున్నట్లు అర్థమవుతోంది. మరి ఈ ‘రావణాసుర’ కథేంటన్నది పూర్తిగా తెలియాలంటే ఇంకొన్నాళ్లు వేచి చూడక తప్పదు. ఈ సినిమాకి శ్రీకాంత్‌ విస్సా కథ అందిస్తున్నారు.