RRR: అదిరిపోయే ‘ఆర్‌ఆర్‌ఆర్‌’ థీమ్‌ సాంగ్‌.. గాయకులు వీరే

ఇంటర్నెట్‌ డెస్క్‌: యావత్‌ సినీ అభిమానులు ఎంతో ఆసక్తిగా ఎదురుచూస్తోన్న చిత్రం ‘రౌద్రం రణం రుధిరం’ (ఆర్‌ఆర్‌ఆర్‌). రామ్‌ చరణ్‌, ఎన్టీఆర్‌ కథానాయకులుగా పాన్‌ ఇండియా స్థాయిలో ప్రముఖ దర్శకుడు రాజమౌళి ఈ చిత్రాన్ని తెరకెక్కిస్తున్నారు. అక్టోబరు 13న విడుదల చేసేందుకు సన్నాహాలు చేస్తున్నారు దర్శకనిర్మాతలు. ఈ నేపథ్యంలో ప్రచారాన్ని మొదలుపెట్టారు. ఇందుకు ‘ఆర్‌ఆర్‌ఆర్‌ థీమ్‌ సాంగ్‌’ పేరిట ప్రత్యేక గీతాన్ని రూపొందించారనే సంగతి తెలిసిందే. ఈ విషయం తెలిసినప్పటి నుంచే ఎవరు పాడుతున్నారా? అనే ఆసక్తి అందరిలో మొదలైంది. తాజాగా చిత్రబృందం ఈ వివరాల్ని తెలియజేస్తూ ఫొటోను విడుదల చేసింది. తెలుగు, తమిళ్‌, హిందీ, మలయాళం, కన్నడ భాషల్లో ఈ చిత్రం రూపొందుతుండటంతో ఒక్కో భాషలో ఒక్కో సింగర్‌తో ఈ పాటని పాడించారు. ఎం.ఎం. కీరవాణి సంగీతం అందిస్తున్నారు. హేమచంద్ర, అనిరుధ్‌ రవిచందర్‌, విజయ్‌ ఏసుదాసు, అమిత్‌ త్రివేది, యాజిన్‌ నైజర్‌ ఆలపించిన ఈ పాట ఆగస్టు 1న విడుదల కానుంది. స్నేహం విలువని చాటిచెప్పే గీతమిది.

పీరియాడికల్‌ యాక్షన్‌ డ్రామా నేపథ్యంలో రూపొందుతోన్న ఈ సినిమాలో అల్లూరి సీతారామరాజుగా రామ్‌చరణ్‌, కొమురం భీంగా ఎన్టీఆర్‌ కనిపించనున్నారు. ఆలియా భట్‌, ఒలివియా మోరీస్‌ కథానాయికలు. అజయ్‌ దేవ్‌గణ్‌, శ్రియ, సముద్రఖని పలువురు హాలీవుడ్‌ నటులు కీలక పాత్రలు పోషిస్తున్నారు. డీవీవీ దానయ్య నిర్మిస్తున్నారు.