Gamanam: ‘గమనం’.. విడుదల ఖరారు

శ్రియ, శివ కందుకూరి, నిత్యా మేనన్‌, ప్రియాంక జవాల్కర్‌ ప్రధాన పాత్రల్లో నటించిన పాన్‌ ఇండియా చిత్రం ‘గమనం’. సుజనా రావు దర్శకురాలు. రమేష్‌ కురుటూరి, వెంకీ పుష్పదపు, జ్ఞానశేఖర్‌ వి.ఎస్‌ సంయుక్తంగా నిర్మించారు. ఈ సినిమా తెలుగు వెర్షన్‌ను డిసెంబర్‌ 10న విడుదల చేయనున్నట్లు చిత్ర బృందం ప్రకటించింది. ఈ మేరకు విడుదల తేదీతో కూడిన ఓ పోస్టర్‌ను ట్విటర్‌ వేదికగా విడుదల చేశారు. ఈ సందర్భంగా నిర్మాతలు మాట్లాడుతూ.. ‘‘సున్నితమైన అంశాలను ఎంచుకుని సుజనా ఈ సినిమాని రూపొందించారు. ఇందులో మూడు భిన్న కథలను చెప్పనున్నాం. ప్రతి ఒక్క కథ మనసుకు హత్తుకునేలా ఉంటుంది’’ అన్నారు. ఈ సినిమాకి సాయిమాధవ్‌ బుర్రా సంభాషణలు అందించారు. ఇళయరాజా స్వరాలు సమకూర్చారు. జ్ఞానశేఖర్‌ వి.ఎస్‌ ఛాయాగ్రాహకుడిగా వ్యవహరించారు.