ఒక్క రాత్రిలో సాగే ‘హెడ్స్‌ అండ్‌ టేల్స్‌’.. ఓటీటీలోకి సునీల్‌ కొత్త చిత్రం

ఇంటర్నెట్‌ డెస్క్‌: సునీల్‌, చాందిని రావు, దివ్య శ్రీపాద, శ్రీ విద్య ప్రధాన పాత్రల్లో నటించిన చిత్రం ‘హెడ్స్‌ అండ్‌ టేల్స్‌’. ‘కలర్ ఫొటో’ ఫేమ్ సందీప్ రాజ్ కథ అందించారు. నటుడు సాయి కృష్ణ ఎన్రెడ్డి దర్శకత్వం వహించారు. ఈ చిత్రం ప్రముఖ ఓటీటీ ‘జీ 5’లో అక్టోబరు 22 నుంచి స్ట్రీమింగ్‌కానుంది. ఈ సందర్భంగా కథానాయిక రెజీనా ఫస్ట్ లుక్‌ని విడుదల చేశారు. ‘ఒక్క రాత్రిలో జరిగే కథ ఇది. ముగ్గురు మహిళలు తమ జీవితంలో ఎదుర్కొన్న సమస్యల్ని ఎలా పరిష్కరించుకున్నారనేది ఆసక్తికరంగా ఉంటుంది. ఈ సినిమా ప్రతి మహిళకూ స్ఫూర్తినిస్తుంది. తమ కోసం, తమ హక్కుల కోసం పోరాడాలని సూచిస్తుంది. యువతతోపాటు కుటుంబ ప్రేక్షకులూ చూడాల్సిన సినిమా ఇది’ అని చిత్ర బృందం తెలిపింది.