Suriya: విడుదలకు ముహూర్తం

‘ఆకాశమే నీ హద్దురా’, ‘జై భీమ్‌’ చిత్రాలతో ఓటీటీ వేదికగా వరుస విజయాలు అందుకున్నారు కథానాయకుడు సూర్య. తన తదుపరి చిత్రం ‘ఎత్తర్కుమ్‌ తునింధవన్‌’ను మాత్రం పక్కాగా థియేటర్లలోనే విడుదల చేయనున్నారు. ఈ విషయాన్ని చిత్ర నిర్మాణ సంస్థ సన్‌ పిక్చర్స్‌ ట్విటర్‌ వేదికగా అధికారికంగా ప్రకటించింది. ఈ సినిమాని వచ్చే ఏడాది ఫిబ్రవరి 4న విడుదల చేయనున్నట్లు స్పష్టత ఇచ్చింది. ఈ మేరకు శుక్రవారం ఓ చిన్న వీడియో గ్లింప్స్‌ను అభిమానులతో పంచుకున్నారు. ఆ వీడియోలో సూర్య పంచె, చొక్కా ధరించి.. ఓ మాస్‌ బీట్‌కి స్టెప్పేస్తూ కనిపించారు. విభిన్నమైన యాక్షన్‌ థ్రిల్లర్‌ కథాంశంతో రూపొందుతోన్న చిత్రమిది. పాండిరాజ్‌ తెరకెక్కిస్తున్నారు. ప్రియాంక అరుళ్‌ మోహన్‌ కథానాయిక. ఈ సినిమాకి డి.ఇమ్మాన్‌ స్వరాలందిస్తుండగా.. ఆర్‌.రత్నవేలు ఛాయాగ్రాహకుడిగా వ్యవహరిస్తున్నారు.