KondaPolam: ‘శ్వాసలో’ వైష్ణవ్‌, రకుల్‌ .. ‘కొండపొలం’ కొత్త పాట విన్నారా!

ఇంటర్నెట్‌ డెస్క్‌: ‘శ్వాసలో హద్దుల్ని దాటాలన్న ఆశ, ఆశలో పొద్దుల్ని మరిచే హాయి మోశా’ అంటూ వైష్ణవ్‌ తేజ్‌, రకుల్‌ ఒకరిపై ఒకరికి ఉన్న ప్రేమని వ్యక్తం చేశారు. ఈ ఇద్దరు జంటగా నటించిన చిత్రం ‘కొండపొలం’. అడవి నేపథ్యంలో సాగే ఈ కథలో రవీంద్ర యాదవ్‌గా వైష్ణవ్‌, ఓబులమ్మగా రకుల్‌ కనిపించనున్నారు. ఈ చిత్రం అక్టోబరు 8న విడుదలకానుంది. ఈ నేపథ్యంలోనే చిత్ర బృందం ఈ సినిమాలోని రెండో గీతాన్ని తాజాగా విడుదల చేసింది. ‘శ్వాసలో’ అంటూ సాగే ఈ మధురమైన గీతం అన్ని వర్గాల శ్రోతల్ని  అలరించేలా ఉంది. స్వీయ సంగీత దర్శకత్వంలో ఎం. ఎం. కీరవాణి ఈ పాటని రచించారు. యామిని ఘంటసాల, పీవీఎన్‌ఎస్‌ రోహిత్‌ ఆలపించారు. సన్నపురెడ్డి వెంకటరామిరెడ్డి రాసిన ‘కొండపొలం’ నవల ఆధారంగా దర్శకుడు క్రిష్‌ ఈ సినిమాని తెరకెక్కిస్తున్నారు. రాజీవ్‌ రెడ్డి, జె. సాయి బాబు నిర్మాతలు.